Rauthla 14.11.2025 (Zirtawpni) : Pu Lalrintluanga Sailo, Dampa Bialtu MLA July 21,2025 khan a boral a. Hemi anih avang hian Damp Bial ah hian By Election chu neih a ngai ta a ni.
Kum 2023 MLA General Election ah khan Dampa Bial ah hian Vote 19,953 awmin vote 17,433 a tla a, chung Vote tla atang chuan Pu Lalrintluanga Sailo MNF Party Candidate khan Vote 6,218 (35.65%) hmu in tlinga puan a ni a. Amah rawn hnaih ber tu hi tun tum a ZPM Candidate tho Pu Vanlalsailova niin Vote 5,926 (33.97%) a hmu ve thung a ni. Tichuan, INC Candidate Pu Lalhmingthanga Sailo tun tuma BJP Candidate ni ta hian Vote 3,146 (18.04%) a hmu ve thung a. BJP Candidate Pu Vanlalhmuaka khan Vote 2,060 (11.81%) a hmu a. Independent Candidate Pi Lalramdingngheti khan Vote 51 (0.29%) a hmu ve bawk a. NOTA ah Vote 42 (0.24%) a tla bawk a ni.
Dampa By Election ah hian Political party hrang hrang ten Candidate an nei thei a. Tun \um By Election ah hian BJP aiawhin Pu Lalhmingthanga Sailo, INC aiawhin Pu John Rotluanga, MNF aiawhin Dr.R.Lalthangliana, ZPM aiawhin Pu Vanlalsailova leh MPC party aiawhin Pu K.Zahingthanga a ni a. Ni 11th November,2025 khan tluang taka vote thlak niin tukin 14th November,2025 hian vote chhiar tur a ni a, vote chhiarna hmun hi DC Conference Hall,Mamit-ah zing dar 8 a tan tur a ni. Tun tum By Election ah hian Dampa Bial ah hian Voter 20,790 awmin vote tla zawng zawng hi vote 17,351 a ni.
Tukin zing dar 8 ah vote hi chhiar tan tura ruahmanna siam niin postal ballot, home voting leh service vote chhiar hmasak ani dawn a, a chhiar tur hian Counting Supervisor, Counting Assistant leh Micro Observer pakhat theuh ruat anni.
Vote chhiarna tur hian dawhkan 9 ruahman a ni a, dawhkan pakhatah counting Supervisor, Counting Assistant leh Micro observer pakhat theuh an thu dawn a, tluang taka chhiar theih anih chuan vote hi chawhma dar 11 ah chhiar zawh hman beisei anI.
