Rauthla 08.11.2025 (Inrinni) : Nimin khan Lawngtlai District Bawrhsap Pu Donny Lalruatsanga chuan Lawngtlai District a Free Ambulance & Free Medical Camp Service chungchanga hmala tu te kawmin, Lawngtlai District tana theihtawp chhuah zel tur in a chah.
Pu Donny Lalruatsanga chuan, Lawngtlai District ah Ocotber 3,2025 khan Free Ambulance Service & Free Medical Centre chu hawn a lo ni tawh a. He hi Lawngtlai mipuite’n tangkai taka an hman a beisei thu leh thawktute pawhin tun aia nasa leh zuala tan lak a ngai thu te, mipuite tam zawkin an chhawr tangkai a, an hman theihna tura a thawktute pawh inpho lang thiam a, theihtawp chhuah chhunzawm zel tur leh thingtling a chengte’n tangkai taka an hnathawh te an chhawr ngei theihna tur pawha tan la turin a chah a ni.
Free Ambulance & Free Medical Centre hmalakna a Medical Officer Dr.T.Laltlansangi chuan an hmalak tawhna te sawiin, October 15, 2025 atangin hmalakna an kalpui tan a ni a. Khawmawi ah Free Medical camp neih ani tawh a, hemi tum hian dam lo mi 120 te inentir niin a thlawnin damdawi te pawh an sem thu a tarlang a. Tin, Free Ambulance leh Free Medical Center - hi District Hospital Lawngtlai-ah an inbun tih sawiin Doctor - 1 leh Nurse- 3 te an awm reng a. Thawhtan leh Ningani ah District Hospital, Lawngtlai Casualty ah an duty thin thu te a sawi lang bawk a ni.
Dr.T.Laltlansangi chuan, Free Ambulance hmang tur ten mumal taka an dil a ngai dawn a, hemi atan hian dilna form siam a nih tur thu a sawi a. Ambulance kal theih lohna hmunah chuan tuialhthei ( Oil ) an tum sak thin dawn a ni, a ti a. Free Ambulance Service hi Lawngtlai District chhung atan chauh anih avangin mipuite pawhin District pawn a hman a rem loh thu an hriat a pawimawh hle a. Tin, Village Council lam te pawhin Free Ambulance Service hi an hman tangkai theihna turin Health Dept lama thawktute nen pawh thawhhona tha tak neih a ngai ani, a ti bawk.
Lawngtlai khawpui chhungah Damdawi In pathum a awm a, heng damdawi In pathum atanga khawpui chhung damdawi In veka refer an nih chuan Free Ambulance service be duh tan 9378057905 ah hian biak thin tur a ni dawn a ni.
