LADC Taxation Check Gate atanga sum hmuh hi a chingpen ta em ni? Thla 10 a sum hmuh aiin thla 4 chhunga sum lut a tam zawk hi thil mak tak ani
-Ziak tu - Elvis Lalthangzuala, Accredited Journalists (10.11.2025)
Lai Autonomous District Council Taxation Check gate hi District Council Revenue hmuh tamna ber tura ngaih a ni a. Department dang zawng aiin Tax pawh hi hmu thar tura ngaih a ni a, an hmuh thatna pawh tam tak a awm ngei ang. Nimahsela, te check gate ah hian eirukna lian tham tak a thleng mek em? tih theih tur a ni a. RTI zawhna chhanna atanga a lan dan hetiang hi a ni a.
Lai Autonomous District Council a Taxation Check gate ah hian April 2024- January, 2025 chhung khan Entry of Goods into Market Tax atangin Rs 8,24,910 hmuh a ni a. Entry of Vehicle atangin Rs 74,180 hmuh a ni bawk.
Kumin April to July thla chhung hian Taxation Check gate ah sum an hmuh zat chu Entry of Vehicle Tax ah Rs 68,410/- hmuh a ni a. Entry of Goods into Market tax ah Rs 8,23,160 hmuh a ni bawk.
Entry of Vehicle atangin April 2024-January 2025 chu Rs 74,180 a ni a. April - July, 2025 chhung hian Vehicle tax ah hian Rs 68,410 a ni ve thung a. An inthlauhna hi Rs 5,770 a ni a, hei hi ngun lehzual a sorkar thuneitute hian an ngaihtuah a tha hle awm e.
Lai Autonomous District Council a Taxation Check gate a duty hi staff thenkhatte’n an inchuh nasa hle tih hriat a ni bawk a. Heng zawng zawng ngaihtuah hian Taxation Check gate atang hian thla sawm (10 months) chhunga an sum hmuh hi ngaihtuahna a ti tam hle mai. Thla li chhunga an sum hmuh nen an inthlauhna hi sing pawh a tling lova, Rs 1,750 chauh a ni bawk si a, sorkar thuneitute kut thleng lo hi a tam hle tihna ani thei ang em. Hei hi thuneitute hian an ngawih bo pui mai mai dawn nge? A tul angin action an la dawn.
Tun thla li chhunga duty te an duty chhung khan lirthei an lut tam thut nge, entry of vehicle tax atang chuan an tam lutuk bawk si lo. He gate ah hian eirukna lian tak a awm tih theih tur a ni.
Kumin January to March, 2025 chhung khan Entry of Goods into Market Tax ah Rs 85,090 hmuh a ni a. Entry of Vehicle ah Rs 17,170/- hmuh a ni bawk.
Tichuan, June leh July, 2025 chhunga Entry of Vehicle hi Rs 68,410 a ni a. Entry of Good into market tax ah hian June leh July thla chhung hian Rs 8,23,160 hmuh a ni ve thung. Entry of Goods a an inthlauhna hi Rs 7,38,070 a ni a. Entry of Vehicle tax an hmuh a inthlauhna hi Rs 51,240 a ni bawk a. A pui rem rem hle mai. Kumin January to March leh June leh July thla Check gate duty te hi thuhmun an ni lova, mi hrang ve ve an ni.
Lai Autonomous District Council a Taxation Check gate hian kalphung tha zawk a an kalphun hun hi a nghahhlehawm hle mai. Tuna duty te hi an duty thei reng dawn lova. Duty rinawm lo an duty leh a nih ngat chuan Tax chhun luh loh ‘eiruk’ hi a tam hle dawn tih a chiang reng mai.
Tunah RTI hmangin zawhna kan zawh te chhan a ni ta a. Heng zawng zawng atang hian thuneitute hi an ngawi mai mai dawn nge? Lo thlir zel ila. Thuneitute hian ngun lehzual in ngaihtuahna seng se, ngawihbo pui mai mai chi a ni lovang. Dikna kan duh a, chu kan duh tak mai chu tun hun hi a tihlan hun remchang a ni a. Tuna duty mek te atang pawh hian an submit zat hi a kim leh kim loh te, a dik leh dik loh te pawh zawhna kan la siam leh zel tur ah ngaih phawt ila.
Taxation Check gate ah Thla 10 a an sum hmuh aia thla li chhung lek a an sum hmuh tam ta hi thil mak tak mai a ni a. Hei thil ah hian ‘EIRUKNA’ a awm ani mai lo maw. District Council lama thuneitute kut ah a innghat tawh a, an la ngawihbo pui duh anih chuan he thil hian kaihhnawih tam tak a nei tihna pawh a ni mai thei a ni.
Kum 2023-24 chhung khan LADC Taxation Dept hian LADC ah Revenue Rs 87,45,000 an chhung lut a. Heng zing ah hian tuna kan sawi lan ber Entry of Good into market tax a hian Rs 6,50,000 an chhung lut a, entry of vehicle tax ah hian Rs 87,000 an chhung lut angin RTI zawhna chhanna kan hmuh a ni. Tichuan, hemi kum ah hian an target hi Goods bik ah hian Rs 6,00,000 niin Rs 50,000 in an khum a. Entry of Vehicle ah hian 80,000 niin Revenue 87,000 niin Rs 7,000 in an khum tihna a ni.
Tichuan, tun sorkar kum kal lai ah hian Entry of Goods ah hian target 40,00,000 pek an ni a. Kumin October thla (7 months) chhung khan Rs 3,702,550 an chhung lut tawh a ni. An hma bak hi Rs 2,97,450 a ni a, an khum ngei turah pawh beisei a ni. Kum khat a an hmuh let tam tak aiin a tam a, thil mak hi a awm zel mai bawk si a. Eirukna kan ti lo thei lovang.
Entry of Vehicle hi han tarlang leh lawk teh ang. KUm 2023-24 chhung khan Rs 80,000/- an target a ni a, Rs 87,000 submit niin Rs 7,000/- in an khum a. Tichuan, Kum 2025-2026 chhung a an target chu Rs 1,50,000 a ni a. Kumin April-October chhung hian Rs 85,890 hmuh a ni tawh a. An hmabak chu Rs 64,110 ani a. Hei pawh hi hetiang zela an kal chuan an khum ngei pawhin a rinawm a ni.
LADC Taxation Check gate ah hi nuamtawlna a ni lova, sorkar hnathawk MR te dah an ni fo mai te pawh hi a fuh lo hle a ni. Kan sorkar hian chhui zui hram se, a lawmawm hle ang. Tunge Revenue hi LADC ah submit lova, mahni private account a submit tih hi chhui ngei ngei chi a ni ang. Revenue hi a luh that chuan District Council ah hnathawhna tur tam tak a awm thei dawn a. Kan hotute an ngawi mai mai lo turah ngai phawt ang. I lo thlir zel phawt ang le..
