MDC General Election inbuatsaihna kal zelah Internet leh Mobile netwokr that lohna hmun khaw 20 te DEO in ngaihpawimawh tha ti

 

 MDC General Election inbuatsaihna kal zelah Internet leh Mobile netwokr that lohna hmun khaw 20 te DEO in ngaihpawimawh tha ti

Rauthla 10.11.2025 ( Thawhtanni) :  Vawiin khan Lai Autonomous District Council (LADC) hnuaia 12th Member of District Council (MDC) inthlanpui 2025 - lo awm tur atan a inbuatsaihna kal zelah Pu Donny Lalruatsanga, District Election Officer ( DEO) chuan Internet leh Mobile Network Service Provider - te a Office Chamber-ah thutkhawm a neihpui.

Pu Donny Lalruatsanga chuan, Inthlanpui lo awm turah theihtawp chhuah mek a nih angin, Internet leh Telecom Service Provider- ten pawimawhna lian tak an nei tih a tarlang a. A bik takin internet leh mobile network that lohna hmun (shadow area) khaw- 20 awmte chu ngaihpawi-mawh a tul hle a ti a. Polling party- ten an duty na tur hmun an thlen tawh thu te, vote thlak tan theih leh poll khar hun leh tul dangah report pek tur a awm avangin, signal tha tak neih a tul hle a ti a. December ni 1 atanga ni 3, chhunga signal tha tak a awm theih nan a chak taka hma la tur leh Tower- tinah power backup- awm tura ruahmanna fel fai tak lo siam turin a ngen a. DEO chuan Mobile signal that loh zualna hmun leh mamawh tul ang angte chu ziaka pek an nih tur thu a tarlang bawk.

        Telecom leh Internet Service Provider - te chuan Inthlan lo awm tur chu an ngaihpawimawh thu tarlangin, thil tul leh tangkai te chu ziaka an dawn hunah an hotute hnena thlen an tum thu an sawi a. Inthlanna fel fai leh tha taka neih a nih theih nan theihtawp an chhuah tur thu an sawi bawk a ni.

He thutkhawmah hian Pu David Lalrinawma, Returning Officer (RO), Pu H. Zonunmawia, Returning Officer ( RO), Pu Collin Hlychho Election Officer (EO) bakah Airtel, Jio, BSNL, Net 7 leh Skynet aiawhte an tel thei a. Pu Donny Lalruatsanga chuan lawmthu sawina neiin hun a khar.