LAWNGTLAI BAWRHSAP HOVIN NCORD LEH OPERATION JERICHO PUALA THUTKHAWM NEI
Rauthla 4th November 2025 : Vawiin khan Lawngtlai Bawrhsap Pu Donny Lalruatsanga kaihruaiin a Office Chamber-ah 'NCORD' leh Operation Jericho ' puala thutkhawm neih a ni.
Pu Donny Lalruatsanga chuan, Ruihhlo tihremna turin sawrkarin ' Operation Jericho ' chak takin a kalpui mek tih tarlangin, NCORD hnuaiah pawh hmalakna tam tak kalpui mek a ni, a ti. Ram leh hnam hmelma lian ber Ruihhlo do turin sawrkar chauh a tawk lo a, tanho leh beihpui thlak ngai tak a nih angin, NGO, Kohhran, VC leh mipuiten theihtawp chhuah a thawhho a pawimawh tak zet a ti. Bawrhsap chuan tun atang a theihtawp chhuah a nih loh chuan hmabak a thim dawn hle tih sawiin, khawtlang nuam leh chhenfakawm zawk siam turte, tu leh fate tana ram nuam zawk siam tur leh chhungkaw nuam zawk siam tura theihtawp chhuah turin kalkhawmte leh Lawngtlai mipuite a sawm nghal bawk.
Pu PC Lalchunglura Superintendent of Police chuan report tawi pekna a nei a. NCORD thutkhawm hmasaa rel tawh bawhzui dan tlangpui- check gate siam leh duty te, Awareness Campaign, drug license holder- te endik, raltlan ten an hman thin Kenbo 125 - two wheeler, endik te chu kalpui mek a nih thu a tarlang a. Operation Jericho- bika hmalakna hrang hrangte tarlang nghalin, tun dinhmunah duty - te mamawh lirthei siamrem fel tawh a nih thu tarlangin, chak taka hmalak zel a nih tur thu a sawi a ni.
Thutkhawmah hian thil pawimawh tak tak sawiho niin, NCORD leh Operation Jericho hnuaia hmalakna awm tawhte leh hmalak chhunzawm dan turte thlirho a ni a. NCORD hnuaiah ruihhlo do kawngah Police, Excise leh CYLA - ten a hmun ngeiah kalin, ngawrh zawkin endik thin ni se an ti a. VC - te pawhin mahni veng chhungah theuh zu leh damdawi zuar awmlo turin chak zawkin hma lo la se an ti a ni. 125 Two wheeler- chu Ruihhlo phurh nan a hluar hle nia an hriat thu sawiin, khauh tak a endik thin ni se, DTO - in a tul angin lo bawhzuiin thupek lo chhuah se an ti a ni. Damdawi zuartute zingah damdawi phalloh an zawrh loh nan endik thin ni se, mipuite hnenah inzirtirna lam uar zawka kalpui ni se an ti a. Ruihhlo ngaite awmhna hmun (Home /Centre) te chu uluk zawk a vil leh endik thin ni se, Lairam Rescue Centre (LRC) chu hmun ngeiah Commitee Member- ten tlawh ni se an ti bawk.
Operation Jericho -chungchangah duty- te mamawh hrang hrang- a bik takin POL leh refreshment - pek a nih theih nan chak zawka hmalak ni se an ti a. Damdawi lo lut tur tha zawka ven a nih theih nan duty- post te pawh hmun hrang hrangah dah belh zel ni se an ti a ni. Ruihhlo do kawngah sawrkar, NGO, Kohhran leh mipuite tanho zel ni se an ti a ni.
