Central YLA in an thilphut a hlawhtlin avangin Total Bandh an thulh

 Central YLA in an thilphut a hlawhtlin avangin Total Bandh an thulh

Rauthla 25.January,2026 (Pathianni) :  12th Lai Autonomous District Council General Election chu December 3,2025 khan neih a ni a. December 9,2025 ah vote chhiar niin party mala sorkar-na siam thei an awm lo a ni.

        LADC Inthlanpui neih ah khan MNF chuan Member ngah berin Seat 25 ah Seat 8 lain, Congress chuan Seat 7 lain, ZPM in Seat 6 an changa, BJP leh Independent ten Seat 2 ve ve an chang. Inthlanpui Result hriatkim a nih atangin LADC ah Sorkarna siam tumin Political Party te ah indawrna kalpui chhunzawm niin, Dt 14.December, 2025 khan ZPM leh MNF ten Sorkar intawm siam turin thutlukna siamfelin, Lairam Legislature Party diin an hruaitu atan ZPM Member Vawmbuk bialtu MDC Pu T.Zakunga an thlanga, December 15, 2025 khan LADC ah Sorkar thar dinturin bawhzui ngaite bawhzui nghal a ni. Tichuan, Dec 22,2025 khan Protem Chairman atan Pu Lallura Chinzah chu lakluh a ni a. Hemi hnu hian CEM approval hi a chhuak mai dawn emaw tih anih laiin, thuthar engmah a awm ta lova. Tichuan, January 6,2026 khan Chairman thlanna neih tura tih ani a, Chairman nomination te file a ni a. Pu Sanghuliana Mualchin, Lungtian Bialtu MDC, MNF  leh Pu H.Vanlaltanpuia, Tuithumhnar Bialtu MDC, INC ten nomination an lo file tawh a. Nimahsela, MNF party ten ZPM nen an thawhhona thutlung an tihtawp tak avangin, sorkar thar piang mai tura ngaih pawh an thulh leh ta a ni.

Tichuan, January 9,2026 khan Member 8 nei MNF leh Member 7 nei Congress ten United Legislature Party diin, Governor hnen ah Sorkarna an siamtheih thu an thlen leh ta a. Central Young Lai Association in thuchhuah siama a tarlan danin Lai Autonomous District Council (LADC) sawrkar siam chungchanga Total Bandh buatsaih tum chu sawrkar atanga thu lawmawm dawngin LADC sawrkar siam turin approval a chhuah tak avangin total bandh neih tur a ruahmanna siam chu thulh a ni tih a sawi.

  Mizoram sawrkar, District Council & Minority Affairs department chuan vawiin ni 25.1.2026 khan hriattirna (notification) ti chhuakin 12th Lawngtlai Chandmary bial atanga MDC atana thlan tlin leh United Legislature Party hruaitu ni bawk C.Lalsawmzuala chu LADC-a Chief Executive Member atan hian a ruat a ni.

  CYLA hian Lai Autonomous District Council inthlanah sawrkarna siam thei an awm tawh hnuah pawh sawrkar lam atanga remtihna a la awm loh avang leh an hmalaknain awmzia a neih loh avangin naktuk January ni 26,2026 hian Lawngtlai district huapin tiam chin awm lo total bandh neih an tum a, mahse thu lawmawm an dawn leh tak avangin an thulh leh ta a ni.

Governor chuan Protem Chairman atan College Veng Lawngtlai bialtu, MNF Member Pu C.Hrangthianga a ruatna pawh vawiin vek khan tihchhuah niin, ruahmanlawk dan chuan Chairman thlanna chu January 28, 2026 khian Protem Chairman kaihhruaina hnuai ah neih a ni ang. Dt 29.Jan,2026 ah Pu C.Lalsawmzuala chu CEM atan fiah a ni ang.

United Legislature Party ah hian MNF MDC 8 leh Congress MDC 7 an vaiin Member 14 an awm a ni.