CHIEF MINISTER-IN 24 MEGAWATT TUIRINI SMALL HYDEL PROJECT (2×12 MW) LUNGPHUM A PHUM
Rauthla 19.January,2026 (Thawhtan) : Vawiin khan Chief Minister Pu Lalduhoma chuan 24 Megawatt Tuirini Small Hydro Electricity Power Plant dinna tur lungphum Tuirini kamah a phum.
Pu K. Sapdanga, Home Minister chu khualzahawm niin P&E Minister Pu F. Rodingliana chuan lungphum inkhawm a kaihruai a, Pu B. Lalchhanzova, I&PR Minister leh Lt. Col. Clement Lalhmingthana, MLA te chuan Chief Minister hi an tawiawm a ni.
Thusawiin Chief Minister chuan, power siamchhuahna lama hma kan sawn theih nan Power Minister leh P&E Department-a thawktute inpekna a sang em em a. An chungah lawmthu ka sawi a ni. Thla hmasa lawk khan Thenzawl Solar Power Plant, Megawatt 10 pe chhuak thei kan hawng a, Sumsuihah Megawatt 5 pe chhuak thei tur Solar Plant kan thawk mek bawk a, hna zaa 20 kan thawk tawh a. Thenzawl leh Sumsuih solar plant hi Mizoram ta liau liau a ni. Tunah 24 Mw Tuirini lungphum kan han phum leh a, 132 Mw Tuivai pawh chak taka bawhzui zel a ni.
Central sorkar hian power supply lama India ram a intodelh theih nan kawng hrang hrangin hma a la a, mahni mamawh khawp power nei lo state-te tan power leina sum leh pai a hautak tial tial a. Chuvang chuan, kan mamawh khawp power thar thei tura chak taka ke kan pen a ngai a. Chu mi kawnga kan hmalakna pawimawh tak chu vawiina a lung kan phum 24 Mw Tuirini hi a ni a. Chak taka thawh a, a hun taka zawh kan tum ang, a ti.
Hna hi kum 5 chhunga zawh tura duan a ni a, power house-ah hian Megawatt 12 pe chhuak thei khawl pahnih, an pahnih belhkhawm 24 Mw tling tur bun a ni ang.
Tuirini Project chanchin tawi:
5 February 2024 khan P&E Department chuan Externally Aided Project (EAP) hnuaia thun turin proposal state sorkarah a thehlut a, State Level Screening Committee chuan 4th April, 2024 khan a ngaihtuah a, a approve a. Department of External Affairs (DEA) Screening Committee chuan ni 28 February 2025 khan External Funding turin a rawn approve ta a ni.
New Development Bank-in a funding tura tih a ni a, project cost 80% hi loan angin NDB atangin lak a ni ang a, central sorkarin a rul ang a. Project Cost atanga 20% hi state sorkar tum ve tur a ni. Total cost of Project hi Rs. 676.98 Crores a ni. Kum nga (5) chhunga thawh zawh tura ruahman a ni.
Lungphum inkhawmah hian Pastor B. Lalthlamuanan hunserh a hmang a, Er. JH Malsawma, E-in-C, P&E leh Er. C. Ropianga, Project Director, Tuirini PMU ten thu an sawi a, Pi K. Lalrinzuali, IAS, Secretary, P&E chuan lawmthu sawiin inkhawm a khar a ni.
