Lawngtlai District chu Drug Free District a nih theihna turin hmalakna kalpui tum ani
Rauthla 24.02.2026 (Thawhlehni) : Nimin khan Lawngtlai Bawrhsap Pu Donny Lalruatsanga leh Lawngtlai Superintendent of Police Pu PC Lalchunglura te chuan DC Office Chamber-ah Chanchinbu mite kawmna an nei.
Pu Donny Lalruat-sanga chuan sawrkarin ruihhlo do kawng hrang hrangin a kalpui mek a, Nasha Mukt Bharat Abhiyan- hnuaiah project lian tak 'Drug - Free District' kum thum chhung atan kalpui a nih tur thu a tarlang a. He project - hi Lawngtlai District chhunga khaw tinah kalpui a ni ang a ti.
Pu Donny Lalruat-sanga chuan, tun atanga ruihhlo do kawngah theihtawp kan chhuah loh chuan harsatan namen lo tawk thei kan ni a. Hemi kawngah hian sorkar ang ringawt chuan hmasawnna lian tak a awm thei lova, kan tanrual a ngai a ni, a ti a. Ruihhlo awm lohna khua din emaw siam chu thil pawimawh tak a ni, tiin khaw tina khawtlang hruaitute theihtawp chhuah turin a chah a ni. Ruihhlo do kawngah chanchinbu mite an pawimawh hle tih tarlangin, mipuite zirtir kawngah theihtawp chhuahpui turin chanchinbu mite a ngen a ni. Ruihhlo do kawngah tha thlah theih a ni lo tih sawiin Pu Donny Lalruatsanga chuan khawtlang hruaitu leh mipuite theihtawp lo chhuahpui turin a sawm nghal bawk a ni.
Pu PC Lalchunglura chuan ruihhlo dona kawngah NCORD leh Operation Jericho - chak taka kalpui mek a nih thu a tarlang a. Ruihhlo do beihpui thlak kawngah tanrual thiam a pawimawh hle tih sawiin, VC, NGO, Kohhran leh mipuite thawhpuiah a sawm a ni.
Pu Lalrindika, SDC chuan 'Project : Drug - Free District- Lawngtlai' nihphung leh kalpui a nih dan tur tlangpui sawizauna a nei a. LADC- hnuaia khua - 99 leh CADC- hnuaia khua - 88 ah te project hi kalpui a nih tur thu a tarlang a ni.
Project : Drug Free District Lawngtlai hi kum 3 chhung kalpui tura ruahman a ni a. Hemi hun chhung hian Village Council Area hrang hrang te Drug Free Village an nihna tura tehna hrang hrang paltlanga, Drug Free Village a puan an nih chuan Independence Day ah Drug Free Village an nihna sorkar in a hriatpuina thuziak hlan an ni ang.
3
