Lawngtlai District ah thla thum chhung atan Operation Jericho kalpui leh dawn

 

Rauthla 08.04.2026 (Nilaini) : Vawiin khan Lawngtlai Bawrhsap Pu Donny Lalruatsanga kaihruaiin a Office Chamber-ah Ruihhlo do beihpui thlakna 'Operarion Jericho' chungchangah thutkhawm neih a ni a. Pu PC Lalchunglura Superintendent of Police chuan a telpui.

        Pu Donny Lalruatsanga chuan kalkhawmte hnena lawmthu sawina a nei hmasa a. Sawrkarin Ruihhlo do beihpui thlakna 'Operarion Jericho' a ngai pawimawh hle tih tarlangin, Lawngtlai District chhungah pawh chak taka kalpui mek zel a nih thu a sawi a. Lawngtlai District bikah nikum October atanga kalpui tan a nih thu sawiin, a hlawhtlinna kawng hrang hranga hmuh niin, Ruihhlo lutchhuak a tlem hle a ni, a ti. Bawrhsap chuan Operation Jericho - chu ni 13 October, 2025 atanga ni 31, December .2025 thleng awh tur niin, he Operation - ah hian Police, Excise & Narcotic, CYLA, YLA Sangau Sub Headquarters, YLA Bualpui Sub Headquarters, Execitive Magistrate, MHIP, LWA, MJA, Eastern Zone VC, 3rd IR leh 34 AR te an awm thu a tarlang . Pu Donny Lalruatsanga chuan 'Operarion Jericho' kalpui mek tihtawp theih a nih lo thu sawiin, district Administration chuan theih ang ang leh chal taka kalpui a nih tur thu sawiin, VC,NGOs, Kohhran leh Lawngtlai mipuite tha taka lo tawiawm zel turin a sawm nghal bawk.

Pu PC Lalchunglura chuan report tlangpui pekna a nei a. Operation Jericho - hnaioah 'check gate' siam a ngawrh taka duty a nih thu a sawi a. Awareness Campaign chak taka kalpui niin, drug license holder- te pawh endik an nih thu a tarlang a. Operation Jericho- hnuaia duty - te mamawh lirthei, POL, Ei leh in tur bakah thil dangte a theih ang anga pek a nih thu sawiin, thawhhona tha tak hnuaiah Ruihhlo do chu a hlawhtling tha hle nia ahriat thu a sawi a. Ruihhlo do kawngah tha thlah theih a ni lo tiin, kalpui chhunzawm a tul thu a sawi bawk a ni.

        Excise and Narcotics lam pawhin report tawi pekna an nei a. Operation Jericho kalpui mekah case - 35 ziahluh tawh niin, mihring -33 man an nih tawh thu tarlan a ni a. Zu bikah 102.400 litres man tawh a nih thu tarlangin, ND& PS hnuaiah tun thlengin case ziahluh a awm loh thu ngaihthlak a ni a. Awareness Campaign - chak taka kalpui a nih thu tarlan niin, uar zawka kalpui a nih tur thu tarlan a ni.

CYLA aiawh lam atangin 'Operation Jericho' kalpui mek a that thu ngaihthlak niin, chhunzawm zel ni se tih a ni a. A bik takin CYLA hnuaia Drugs Reduction Squad (DRS) ten chak takin hma an lak theih tur thu tarlan niin, Lawngtlai District chhunga Ruihhlo rêm theihna tura theihtawp an chhuah zel tur thu ngaihthlak a ni.

Thutkhawm chuan 'Operation Jericho' vanga nasa taka Ruihhlo a tlem thu pawm tlangin, State sawrkarin kalpui chhunzawm lo pawh ni se Lawngtlai District bikah chuan thla thum chhung atan kalpui chhunzawm ni se an ti a. Operation Jericho Duty post- pawh hawn belh ni se tiin, mumal taka duty thin tura hmalak ni se tih a ni a. Lawngtlai Town chhung bikah chak zawka hmalak a nih theih nan CYLA - te nen thawhho ni se, a tul dan ang angin Police leh Excise - ten puih thin ni se an ti bawk a ni.