1st Southern Cooperators Meet 2026 chu LADC CEM Pu C.Lalsawmzuala'n khuallian niin hun a hmanpui
Rauthla 19.05.2026 (Thawhlehni) : Vawiin May 19, 2026 hian Lai Autonomous District Council Hall, Lawngtlai ah 1st Southern Cooperators Meet 2026 neih a ni a, LADC CEM Pu C.Lalsawmzuala chu khuallian niin hun a hman pui a, thupui atan 'Eizawnna hna tluantling neih nan cooperative movement tihchak' (Strengthening Cooperative Movement for Sustainable Livelihood) tih chu hman ani
LADC CEM Pu C.Lalsawmzuala chuan, kan District hi Cooperative Society lamah hma kan sawn a, society mawhphurhna keimahni ah hian a innghat a, tanrual a ngai ani, chu kan tanrualna atang chuan malsawmna tam tak a lo thleng dawn tih hria a, theihtawp chhuah theuh turin Society member te a ngen a ni.
Khuallian Pu C.Lalsawmzuala chuan kan pi leh pu te chhan atangin mahni intodelh hnam kan nihna kha nunpui chho leh ta ila. Society a tanpuina beisei avang ringawt a kalpui kan awm anih erawh rei kan daih dawn lova. Sorkar atang pawhin tanpuina dawng lo mah ila, theihtawp kan chhuah tlat chuan kan hma ah hlawhtlinna leh malsawmna a awm tih hre thar theuh ila. Theihtawp kan chhuah a kan thawh phawt chuan in tan sorkar hi a inhawng a ni. Mahse, a dawhthleng taimakna, tumruhna, teirei peih leh rinawmna kan neih a ngai ve thung ang. Mahni mimal hamthatna ringawt ngaihtuah lova, hlawhtlinna rahbi rap tur chuan kan thawhpuite nen thawhhona tha, inrin tawnna leh tanrualna neih a ngai dawn. Kan thawk tak tak anih chuan sorkar ang pawhin tanpuina hi a theih ang angin kan ngaihtuah zel ang. Mahse, a thlawn a sum dawng lova, peipung a, dinchhuah erawh i tum ang u, tiin a sawm bawk ani.
Khuallian chuan, Central sorkar pawhin Cooperative Society hi a ngaipawimawh hle a, a duh ber erawh tanrualna neih a, hlawhtlinna in chan hi a ni. Chumi tur chuan Society in kan tih tur leh tih loh tur kan hriat a ngai a. Midangte rinchhan ringawt a, member nih tum lova, mahni ke a ding thei tura kal thei Society nih tum ila. Kan thawhrah hi keimahni ngeiin kan seng dawn avangin rinawmna leh dikna nen ke pen zel ila. Kristian kan nihna te pawh hi heng ah hian ti lang ngam a, midangte tan malsawmna nih tum tlat a. Ringtu kan nihna anga kan tawngtai chhanna te pawh hi kan society enkawl ah hian lang chhuak thei tur khawp in tan la thar zel ang u, tiin Society member kalkhawm te chu a sawm ani
