Joshua Van Mizoram-ah a lokal dawn
Rauthla 09.05.2026 (Inrinni) : Joshua Van hi USA a Lai / Mizo tlangval ani a. Khawvel hriat a Zofate Ultimate Fight a min pholang tu ani.
Joshua Van hi Myanmar a piang niin USA ah an pen thla a. An pem hlim hian tawng pawh a thiam lo hle mai a, amah pawhin hrehawm a ti hle ani. Chutiang karah chuan school velah mite hmuhsit leh tihnawmnah a tawk nasa hle a. Chu chuan a nun nasa takin a thlak ta a, huaisenna leh tumruhna neiin Mixed Martial Arts (MMA) chu a ti chho ta a ni.
Mixed Martial Arts (MMA) ah bul tanin a che tha chho hle a. Kum 24 lek ani Chungin Pro MMA - ah vawi 16 chak tawhin vawi hnih a tlawm ve thung ani. Kum 2023 kha UFC (Ultimate Fight Championship) ah bul a tan a, a khel pawh a hmuhnawm thin hle ani. June 2023 khan Zhalgas Zhumagulov hnehin UFC debut-ah hnehna a chang nghal ani.
Joshua Van hi 'The Fearless' tia hriat lar ani bawk a. UFC ah vawi tam tak hnehna a chang tawh a, tunah hian Fly weight division ah a khel mek a. December 6,2025 khan Alexander Pantoja hnehin Zofate zing ah a vawikhatna leh a hmasa ber atan Fly weight Champion belt chu a chhuhsak ta ani. Joshua Van hi UFC Champion naupang ber dawttu leh Asia a piang mipa champion hmasa ber a ni bawk.
Zofate zing a hetiang mi kan nei hi a chhuanawm hle a. A che hi a rang hle a, a kut a rangin, hlauh hi a nei lo tih theih tur ani. Joshua Van thatna ber chu a boxing skills niin, a kut a rang em em a, UFC-ah minute 1 chhunga a tumpuite hnek fuh hnem ber record a chelh mek ani. Hei bakah hian flyweight ah a tumpuite nena khawih fuh zat inthlau ber record a chelh mek bawk ani.
Khawvel hriata Zofate UFC a mi pholangtu Joshu Van chu Mizoram State Mixed Martial Arts Association te buatsaih MIMSA Fight Night May 30, 2026 hian R.Dengthuama Hall, Mualpui Aizawl Mizoram ah a hmel kan hmu dawn ta e.
Rauthla News
