KMMTTP Road in a nghawng chungchang sawihona neih ani
Rauthla 11.09.2026 : Vawiin September 11, 2026 hian Central YLA Golden Jubilee Hall-ah Central YLA buatsaihin Kaladan Multi Modal Transit Transport Project in a nghawng chungchang sawihona neih a ni a. Pu T.Lalhlimpuia, Study Committee Chairman leh Lunglei West Bialtu MLA in hun a hmanpui a. Pu Zomuana, Member Secretary Impact Study Committee on Kaladan Multi-Modal Tansit Transport Project (KMMTTP) road in a nghawng tur leh lo hmachhawn dan tur, he Project kan tangkaipui theih nana tihtur hrang hrangte a sawi.
Study Commitee Chairman Pu T.Lalhlimpuia chuan, Kaladan Multi Modal Transit Transport Project hi sorkar in ruahmanna a siam angin anih dan tur angin a hman theih thuai dawn a. Hei hian hmasawnna nasa tak a rawn kalpui dawn a ni. Chu hmasawnna chu a ram neitute hian tangkai taka kan lo chhawr a pawimawh hle dawn a.Ram dang mite’n kan ramah he hmasawnna hmanga min rawn chimral lohna turin tun atang hian ngaihtuahna kan lo sen a tul hle a ni, a ti a. He Project hian kentel hrang hrang a rawn nei dawn a, chu chu a tha zawng leh a tangkai zawng kan hman theihna turin tun aia chak leh tha zawka inbuatsaihna hi kan kalpui a tul hle tawh ani, a ti bawk.
Pu T.Lalhlimpuia chuan, sorkar in a ram mite’n he project a hlawhtlin huna a hlawkna kan tel theihna tur te, ram neitu kan nihna ang taka hna tha leh sang zawk kan thawh theihna tur te, hmasawnna in a ken tel te tangkai leh hlawk taka kan tel loh a hlau a, hna hniam zawk leh ram dang mite hnuaia hna hniam zawk thawktu ah kan tang an tih hi a hlauhawm hle a. Chuvangin, sorkar pawhin he kawngpui hmasawnna in a kentel zirchiang turin Study team hi a din a. Tunah hian College thenkhat ah te chuan a zirhona te pawh kan lo nei hial tawh a. Tun tumah Central YLA ten a nachang hria a, hetiang hun an buatsaih thei hi a lawmawm hle a. Vawiin a hun rawn hmang tu zawng zawngte pawhin ngaihtuahna thuai tak kan sen a tul hle dawn a ni, a ti.
Pu Zomuana, Member Secretary in kalkhawm te hnenah KMMTTP Project kan tangkaipui theih nana tihtur hrang hrangte a sawi a. Hemi hnu hian kalkhawm te atangin sawihona leh zawhna leh chhan hun te hman a ni.
Vawiin a KMMTTP chungchang zirhona ah hian MLA pahnih Adiviser to CM, Dr.Lorrain Lalpekliana Chinzah leh Pu C.Ngunlianchunga te leh LADC a MDC te an tel a. Tin, Central YLA hruaitute bakah hian Lawngtlai khawpui chhunga Branch YLA te, NGO, Kohhran Thalai Pawl hrang hrangte, Commercial Vehicle hruaitute, District Council a Officer Association hruaitute bakah chanchinbumite an tel a ni.
Vawiin sawihona hun hi Pu Jh.Lalrindika, Central YLA General Secretary in a kaihruaia, Rev LH.Lalpekhlua LIKBK General Secretary in hunserh hmangin Pu F.Lalrothanga, Central YLA President in lawmthu sawina hun a hmang.
