LAI PUAN HUMHALH LEH TIHHMASAWN CHUNGCHANGA STATE LEVEL WORKSHOP NEIH A NI
Aizawl, September 29, 2026: Department of History leh Research Development Cell–IQAC, Government Aizawl West College ţangkawp buatsaihin “Evolution of Textiles in Mizoram: A Focus on Lai Textile Heritage” tih thupui hmangin State Level Workshop chu Government Aizawl West College auditorium-ah neih a ni. Khuallian Pu C. Lalsawmzuala, Chief Executive Member, Lai Autonomous District Council (LADC) chuan Lai puan leh hnam thuam humhalh, zirchianna leh chhinchhiahna kawnga ţan lak lehzual a ţul thu a sawi.
Pu C. Lalsawmzuala chuan Zohnahthlak hrang hrangte hian kan hnam rohlu cultural heritage te hi in nek nan a hmang lo a, in pumkhatna atan hmang thei ila, chu chuan national integrity thleng a nghawng thei a ni a ti a. Pi leh pute’n puantah leh la deh thiamna ropui tak themthiamna an nei a, Laifate hi kan thlirna mitah chuan kan chungnung deuh ni a hriatna te pawh kan nei ve. Lai hnam puan tah kum 1855 a mi kha Victoria and Albert Museum, London, United Kingdom-ah khuan a awm a, hetah pawh hian Silk an lo hmang daih tawh a ni. Hnika, Khuptangtial, Nawnthum hni, Chawngnak, Canlo leh Biarpi pawnzia ropui tak tak lanna te chu Lai hnam nunphung leh kut themthiamna tilangtu a nih mai bakah hnam humhalhna, hnam ropui an nih zia tarlang tu an nih thu a sawi a. Lai thuam zirna hi international emaw state level emaw a pawh nise US a neih a nih tawh bak chu kan ramah chuan a vawikhatna tur niin a sawi. Khawl changkang leh tahdan thar a lo darh zel laiin, pi leh pute puantah dan leh puan nihna tak humhalh a pawimawh thu a sawi bawk.
“India ram zalenna sual lai pawh a an hmanraw ţha ber chu mahni hnam thawmhnaw ngaihsanna leh chawikanna (Swadeshi) kha a ni a. Hruaitu ropui Gandhi-a pawh a ropuina chu ama kutchhuak ngei thawmhnaw a inbel kha a ni” tiin hnam puan ropuina a sawi a. Lai puan chi hrang hrang lo chhuah dan, tah dan, ze mawi leh rawng awmzia zirchiang a, ziaka chhinchhiah (documented) mai bakah puantah thiamte kawmna video siam a ţul thu a sawi. Hemi kawngah hian mithiamte nen thawhho zel LADC-in a tum thu a tarlang a. Handloom fair leh exhibition neih tam zel a, design leh quality tihchangtlun leh hralhna kawng zauh nan designer-te nen thawhho dan ngaihtuah a tum thu a sawi bawk. Central sawrkar puihna hmanga LADC chhunga Lai Textile Heritage Village din theih dan zawn a tum thu a tarlang.
Inaugural programme hi Dr. R. Lalsangpuii, Head, Department of History chuan a kaihruai a; Principal Dr. P. L. Ramliana’n khualţha te lawmna thu a sawi a. Workshop-ah hian Dr. Samuel VL Thlanga’n thupui sawizauna (Keynote) neiin, mithiamte- Dr. Rosaline Varsangzuali – Associate Professor, GHBC, Lalduhawma - Folk Artist, S. Lalruatfela Research Scholar te’n thupui thlan bik sawihona an neih bakah Model te’n hnamthuam te an entir a ni. He hunah hian zirlaite mai bakah research scholar-te leh Lai puan humhalh leh chawilar kawnga tui mite an tel a ni.
