Chhim lamah BJP in nasa takin hma kan sawn - Vanlalhmuaka , BJP Mizoram State President
Rauthla 06.06.2025 (Zirtawpni) : BJP Mizoram chuan vawiin 6th June, 2025 (Friday) hian BJP Lunglei District Office ah mi thar lawmluhna hun neiin, inkhawm hi Pi R. Lalbiaktluangi, BJP Lunglei District President-in a kaihruaia, Pu Vanlalhmuaka, BJP Mizoram State President-in lawmluhna hun leh thusawina hun neiin, Dr. K. Beichhua, MLA & State Core Group Member-in thusawina hun a nei bawk.
Pu Vanlalhmuaka chuan, thusawin, "Chhim lamah BJP chuan nasa takin hma kan sawn a, vawiina BJP rawn zawm tharte avangin lawmthu ka sawi tak meuh meuh a ni," a ti.
Pu Hmuaka chuan, "Lunglei hi khawpui pawimawh tak a ni a, Mizo lehkhathiam hmasate lo chuahna hmun leh Zoram mi challang tak takte rawn chhuahna hmun a ni bawk a, Party dangte'n kan nihna loa min beih fo avang leh BJP len an hlauh avangin dawt hmangin min bei ṭhin a, nimahsela BJP nihna dik tak erawh vawiinah chuan kan hmu chiangin a hlauhawm loh zia leh Development Party kan ni tih an hmu ta zel a ni," a ti.
Pu Hmuaka chuan, "vawiina BJP Chhungkuaa inpe tharte hian tih tur kan nei nghal a, Pu Modi-a'n Mizoram ah hmasawnna nasa tak a lo siam tawh puangzar turin kan inbuatsaih anga, PM Modi avanga mi retheite'n malsawmna nasa tak tak kan dawnte hi Party dang chuan mipui nawlpui hriat atana an hlauh avang leh BJP len an hlauh avangin an sawi duh lova, vawiinah hian Development thu tlangaupui turin BJP Family ah kan lo lawm lut che u a, Mizoramin Development kan beisei kan hmuh theih nan theihtâwp chhuah turin ka chah bawk che u a ni," a ti.
Pu Hmuaka chuan sawi chhunzawmin, "Sorkar kal tawh leh Central ah tuman an tih theih loh rel kawng lian ber leh ṭha ber chi Pu Modi-a'n mi pe a, Pu Modi-a kaihhruai kum 11 sorkar chhung hian double Lane Mizoram hmun hrang hrangah siam a ni bawk a. PM Modi-a chuan Mizoram min hmangaiha, kan mamawh development min pe zel a ni. Lengpui airport pawh a tihlawhtling tu leh tipuitling tute chu BJP hotute Pu LK Advani te kha an ni a, AR sawn chhuah pawh Mizoram sawrkar tih theih loh Pu Modi-a kaihhruai BJP hnuaiah Mizo te duh dan ang ngeiin min sawn chhuah sak a ni. BJP chuan kan ti ang kan tih chu ti hlawhtling ngei ngei ṭhin, tute Party emaw anga kan ti ag ti a, ti leh lo ang kan ni ve ngai lo. Tin, Lunglei kawng pawimawh ATL road pawh siam ṭhat dan awlsam deuh chu, BJP kaltlangin ram rawngbawl hna thawk ila, chumi hnu ah Pu Modi-a chuan kawngpui ṭha min rawn pe mai dawn a ni. mahni sakhua leh hnama rinawm lo tan ram rawng a bawl theih loh tih hi Central-a kan hotu te'na min zirtir nasat ber a ni. Chuvangin kan State a Sorkarna lo chelh tawh te hi Kristianna ah an rinawm leh awm loh chu, ram rawng an bawl dan ah kan teh mai hian a fuh awm a ni," a ti bawk.
Dr. K. Beichhua chuan, "Lunglei hi Mizoram laili tak khua a ni a. Politics pawh hi lunglei suk thleka zir hian boruak a dang vek ṭhin a ni, a ti a.
Pu Beichhua chuan sawi chhunzawmin, "vawina kan party zawm thar mi 15-te hian kum 2028 MLA inthlan in thlir lawk tur a ni a. Politics tel loin tumah kan awm thei lova. Chuvangin Politics ṭha hi Mizoram hian a mamawh hle a ni. Roreltu ṭhain ram a siam ṭha a. Mipuite pawh an thla a muang ṭhin a ni. Ram ropui siam tur hian mi tam tak a ngai lo a. Mi ṭha tlemte pawh hian ram a siam ṭha thei a, ram ropui ah a siam thei a ni," a ti bawk.
