ISRAEL-IN IRAN A BEI TA : IRAN-IN "ZIONIST LEH US-IN PHUBA LAKNA NASA TAK AN TUAR DAWN" A TI
Rauthla 13.06.2025 (Zirtawpni) : Tukin zing lam khan Israel chuan Iran ram chu "Operation Rising Lion" tih codename hmangin a bei chho ta a, vawikhat an va bomb chiam tumin Iran sipai hotu lawk leh Nuclear Scientist thenkhat an thi a, thawh hnihnaah hian Iran Top official chenna hmun te beih leh a ni. Israel hian Iran nuclear ralthuam siam tumna hmunpui Natanz nuclear facility, Isfahan province a lei hnuai 7.5 meter a thuka uluk taka cement concrete a siam te beiin, meikhu dum ngen ngun leh kangmei a siam nasa hle.
NBC News chuan Israel Air Force te chuan, Iran Revolutionary Guard Force (IRGC) hotu leh Iran Armed Forces Chief of Staff Maj. Gen. Hossein Soleimi bakah, Iran Nuclear Scientist leh Iran Head of Atomic Energy lam hotu hlui Dr. Fareydoun Abbasi pawh thi zingah telin a sawi. i24 Israel news chuan, hliam na tak tuar zingah Iran Spiritual Supreme Leader Ali Khameini Top Adviser Ali Shamkani pawh a tel, a ti.
Iran President Masoud Pezeshkin chuan nimin khan, Ilam province a Iran nuclear plant hmun tlawhin, "Iran chuan nuclear siamna turin uranium thlitfimna kan thawh chhun zawm zel ang a, kan uranium enrichment tihna tura beitute chu tu pawh nise, nasa takin kan beilet zel dawn a, kan tum kan tihlawhtling ang a, hmalam panin kan kal zel ang", a ti a, chumi hnu lawkah Israel chuan Iran in rinlawk hmain, "preemptive strike" in a bei ta thut mai a ni. US chuan Israel ten Iran luhlul chhuah an tuk tawlhnaah hian, khawvel hriatah kan inrawlh ve lo ve, tiin a kut a lo silfai thuai thung. Chutih rualin US President Donald Trump chuan, Iran nena nuclear chungchanga inbiakna chu tha taka kalpui zel a duh thu leh Diplomatic Resolution hmanga inremna an lo siam a nih chuan, Iran chu ram ropui tak an nih tur thu a sawi rualin, inremna kawng an zawh duhlo a nih chuan, "Thil eng emaw a thleng thuai ang" a tih hnuah lawkah Israel chu che phutin, Iran a bei zui ta a ni. Trump chuan Israel chu a che tha hle ang (could very well) tiin a sawi zui a ni.
Donald Trump chuan, thil engemaw Middle East bialah a thleng thei tih sawiin, "Iran chuan engti kawng zawng mahin Iran chuan nuclear ralthuam a nei tur a ni. Thil hote (simple) te mai a ni e, a khirkhan viau lo", tiin Selina Wang, ABC News palai zawhna a chhang.
Marco Rubio, US Secy of State chuan, Israel-in Iran a beihnaah an tel ve loh thu sawiin, Israel chuan mahni in veng turin dikna an nei a, US beih tumtute chu na taka chhan let an ni ang, tiin Israel chungchanga America dinhmun a sawifiah. "US kan tel ve lova. Tun dinhmunah Israel te tan chet ngeina turah kan ngai. Iran in US a bei tur a ni lo, a bei a nih vaih chuan chhanletna chu a nasa hle ang", tiin.
Pete Hegseth, US Defense Secy chuan US House Armed Service Committee hmaah nimin khan, "Bibi (Benjamin Netanyahu sawina) chuan a ram tan thil tih hmasa a nei a. Keini pawhin kan ram leh hnam tan tih hmasak tur kan nei. President Trump chuan remna leh muanna siam a duh reng a, khi Middle East bial (region)ah khan awm ze neiin kan kal reng alom...", tiin a hrilhfiah. Chutih laiin Middle East biala US sipaite chu inralring renga awm turin hrilh an ni.
Iran chuan kar kalta khan US nen nuclear ralthuam chungchanga inbiakna an neih mek a hlawhchham a nih chuan, Middle East biala US military base te an beih tur thu an lo chhak chhuak tawh a ni. Iraq, Bahrain leh Kuwait rama US Embassy staff hote chu tul bik taklo chu insawn chhuak emaw, haw rih turin a lo hriattir tawh bawk.
Vawiin dar 11am-ah President Trump chuan a Khawnbawl Upa -National Security Council member te nen White House a "Situation Room" ah Emergency Meeting neiin Middle East bial leh Israel leh Iran inkar boruak uluk takin an thlirin, an sawiho ang. Media/Cameraman awm phal a ni dawn lova, Media thenkhat chuan Situation Room-a Trump a kal tur thlalak sak pawh ni dang angin a remlo, tiin an ziak.
Benjamin Netanyahu, Israeli Prime Minister hlauh nei lo, Juda hnam -Sakabaknei huaisen anga Benjamin hnam thlah a mi chuan, Israel mipuite hnenah hetianga Iran an beih chiam hnu lawkah thuchah sawiin, vawrh darh chiam a ni a: ,"Israel chuan duhthlan tur kan nei lo. Israel te tana hlauhawm lo thleng thei leh awm tur chu tihbo a tihchhiat a nih hma chuan, kan beih chhun zawm zel ang", a ti chheu chheu mai. Iran hote leh an thui hruaite an vau rum na el awl hle. Ngam leh ngam, incho ve ve chu han in khuai nuai mup mup mai tehse! A ralmuang chin atangin, "_Indona ropui, i hun tiam thlen tir la. Mikaela tir chhuakin Setana man se_", tiin khuangpui leh khuangte chum chilhin lo zai mup mup tawh ila (_tiin duhaisamin, kan lo dung chhir miah miah mai dawn em chu le!?_)
Israel Prime Minister Benjamin Netanyahu kaihhruai "sawhchiar sorkar" chu tun hnaiah Juda sakhaw atchilh a, dum rumra zual (ultra-orthodox Jewish) te chuan, sorkar dan angin Juda Orthodox hote pawhin kum 2 tal sipaiah tang ve se, tih mandatory law/ dan siam tum duh loh vangin Netanyahu kaihhruai sorkar paihna tur Knesset (Parliament) a Bill put luh chu, an sawiho hrep hnuah vote 61-53 in hnawl a ni a, chuvangin PM Netanyahu chu tui taka mu theiin, a sorkar chu a nghet tawk a, "Saipui kal lai, Ui tang bauh din theih loh", tih ang maiin Gaza War leh Iran War chu a kalpui chho mup mupin, hmalam panin a kalpui miah miah zel dawn, ni berin alang.
Israel Katz, Israel Defense Minister chuan, "Operation Rising Lion" neih vangin sipai sing tam koh kir mek an nih thu leh Israel mipuite chu hmun him chuha inral ring reng turin a chah a, "Iran chuan thungrulhna turin drone, missile leh long-range ballistic missile hmangin Iran chuan Israeli mipui pawisawilo te chen tamna an rawn bi tumin, bei mai thei niin a sawi. Tel Aviv khawpui chhungah ral khel dar (siren) vuak rik vung vung a ni.
ABC News leh Reuters News chuan, hetianga Iarael ten "preempti strikes" hmanga Israel ten Iran an bei phut mai hi, Israel intelligent leh Mossad Spy te chuan, Iran hian nuclear bomb 15 vel thleng siam theih maina turin Uranium thlitfim an lo nei diam tawh, niin a sawi.
US House Speaker Mike Johnson chuan, Israel ten mahni himna tur ngaihtuah a, Iran an beihna chu an thlawp tlat tih a sawi a, chutih laiin Democrat Senator Jack Reed, Senate Armed Forces Committee member chuan, Israel te chu awm hle hle thei lova za zek zek a, buaina siamtuah a puh: "Middle East bialah boruak tha lo zawk a thlen tir phah thei a, khawvel chu buaina chhumpui ten a tuam a, a khuh mek laiin, harsatna leh buaina leh chiaina nasa takin a chim a, thlen zel tirna tlak a ni tawhlo a ni", a ti. Reuters news chuan, hetianga Israel ten Iran an beih tak avangin, khawvelah oil man chu 7% a to chho dawrh a, US dollar hlutna erawh a pung chho sawt thung. Eng ang takin nge Israel leh Iran te hi an in thungrulh ang a, phuba an in lak tawn zel dawn a hriat lohva...I lo thlir zel phawt mai teh ang u
-CT LALRINAWMA
