Editorial
Ruihhlo do turin i tangrual ang u
Vawiin hi International Day Against Drug Abuse & Illicit Trafficking a lo ni leh ta reng mai. Ruihhlo do-na kawngah rilru ngaihtuahna thar kan put a, kan tanrual a ngai ta hle mai a. Ruihhlo dona kawngah kan pen chhuak ve thei lo anih pawhin ‘Kei chu Ruihhlo lakah ka fihlim tur a ni’ tia rilru thar kan put erawh a tul hle awm e.
Tunlai chanchinthar kan hriat leh kan hmuh tam ber chu Ruihhlo man chanchin hi a ni awm e. Heng zawng zawng hi khawchhak lam atanga lokal a ni deuh vek mai bawk si a. Kan ram thenawm a kan unau-te ram buai avangin harsatna namen lo an tawk a. Kan ramah an rawn tlanchhia a, keini lahin kan theihtawp chhuahin kan lo tuamhlawm a, chu chu remchang ah an la emaw tih mai theih turin ruihhlo nasa takin an rawn tawlh lut bawk si a. Chuvangin, an ni ho lo enkawl dan tawk pawh hi kan thiam a tul hle awm e.
Khawvel a awm chhung hi chuan Ruihhlo hi a rem tak tak thei dawn lova. Nimahsela, hei erawh hre reng ila. Ruihhlo lo tawlhtu te hi thawhpui lo ila, heng ruihhlo tawlhru thin te hi Kohhran leh khawtlang kan inrelbawlna ah te pawh hian enkawl dan tawk kan thiam pawh a tul hle awm e. Sum leh pai an neih avanga khawtlang leh kohhran a an inpekna te hi kan haider ngam pawh a hun ta viau mai. Chutiang anih loh chuan dinhmun tha an lo luah vat a, chu chu remchang ah la in nasa takin ruihhlo tawlhruk leh sumdawnna remchang ah an lo la tawh thin a ni.
Kan sorkar in theihtawp a chhuah a, NGO te theihtawp an chhuah bawk a. Ruihhlo do tur hian ‘Kei pawh hi ka tel ve dawn’ ti a, kan tanrual loh chuan, kan ram hi chenna tlakah kan chhuah lovang tih a hlauhawm ta hle mai. I tangrual zel ang u.
