𝗧𝗥𝗨𝗠𝗣-𝗔'𝗡 𝗜𝗦𝗥𝗔𝗘𝗟 𝗣𝗠 𝗔 Ṭ𝗔𝗡, 𝗖𝗡𝗡 𝗥𝗘𝗣𝗢𝗥𝗧𝗘𝗥 BA𝗡𝗧𝗜𝗥 𝗔 𝗗𝗨𝗛, 𝗜𝗥𝗔𝗡-𝗜𝗡 𝗡𝗨𝗖𝗟𝗘𝗔𝗥 𝗕𝗢𝗠𝗕 𝗡𝗘𝗜𝗛 𝗔 𝗧𝗨𝗠 𝗥𝗨𝗛!

 𝗧𝗥𝗨𝗠𝗣-𝗔'𝗡 𝗜𝗦𝗥𝗔𝗘𝗟 𝗣𝗠 𝗔 Ṭ𝗔𝗡, 𝗖𝗡𝗡 𝗥𝗘𝗣𝗢𝗥𝗧𝗘𝗥 𝗕A𝗡𝗧𝗜𝗥 𝗔 𝗗𝗨𝗛, 𝗜𝗥𝗔𝗡-𝗜𝗡 𝗡𝗨𝗖𝗟𝗘𝗔𝗥 𝗕𝗢𝗠𝗕 𝗡𝗘𝗜𝗛 𝗔 𝗧𝗨𝗠 𝗥𝗨𝗛!

(𝙸𝚗𝚔𝚊𝚑𝚑𝚊𝚒 𝚑𝚗𝚞 𝚝𝚑𝚞 𝚝𝚊𝚠𝚒 𝚕𝚎𝚑 𝚗𝚊𝚠𝚒 𝚜𝚒 𝚕𝚘)

𝓟𝓱𝓾𝓪𝓱𝓴𝓱𝓪𝔀𝓶𝓽𝓾

~ Zoa Tlau (26.6.2025 zing dar 7:40)

                                   Buannel Cabin

Donald Trump chuan Israel Prime Minister Benjamin Netanyahu chu a chungthu ngaihtuaha 'trail' neih a ṭul kher lo a ti a. Ngaidam ula, 'trail' neih tumna hi sût (cancel) leh rawh u, a ti. Trumpuia hian Bibi chungthu ngaihtuah tumna chu dik loa puh luiha dik zawka lâr tumna mai mai 'witch hunt' ang chauh a nih thu a sawi.

𝗜𝗿𝗮𝗻 𝗮𝗻 𝗰𝗵𝗵𝗲 𝗵𝗻𝗲𝗵 - 𝗖𝗜𝗔 𝗰𝗵𝗶𝗲𝗳:

CIA Director John Ratcliffe chuan US-in Iran nuear siamna hmun pathum a sawp chhe vek tih chungchanga inhnialna awm mêk chu ṭhelhin, Donald Trump-a sawi ang ngeiin Fordow, Natanz leh Isfahan hmun te hi US hian a tichimit vek tih a puang ta a. "Din thar leh turin a kuma kum an mamawh ang," a ti.

𝗜𝗿𝗮𝗻-𝗶𝗻 𝗻𝘂𝗰𝗹𝗲𝗮𝗿 𝗻𝗲𝗶𝗵 𝗮 𝘁𝘂𝗺 𝗵𝗹𝗲:

Iran chuan nuclear ralthuam siam a tum hle nia ngaih theih turin a endiktu, nuclear thuneitu ram 35 intelkhawm, International Atomic Energy Agency (IAEA) aṭangin inhnuhdawhna Parliament-ah bill an passed ta a. An ram Supreme National Security Council-in a pawmpui ngei an beisei. IAEA endik phâk lohah an awm tawh dawn tih Iran foreign minister chuan a sawi.

Ni 12 an inbeih hnuah Iran chuan an 'airspace' chu an hawng ve leh ta a. Boruak muanawm lam zawng a kal mêk avangin Iran lama khualzin tan pawh hun ṭha a inher ṭan leh tawh.

𝗡𝗔𝗧𝗢 𝘀𝗲𝗰𝗿𝗲𝘁𝗮𝗿𝘆 𝗴𝗲𝗻𝗲𝗿𝗮𝗹-𝗶𝗻 𝗨𝗦 𝗮 𝗳𝗮𝗸:

Nimin maiah Hague-ah NATO meeting neih a ni a, Middle-east buaina hian sawi a hlawh hle a. Iran leh Israel hi NATO member ram ni lo ve ve mah se, Israel erawh NATO zawlpui ram a ni thung. NATO Secretary-General Mark Rutte chuan US-in Iran-a nuclear hmun pawimawh pathum a bomb fakna a chhakchhuak chu Iran foreign secretary chuan a sawisel zui nasa hle. Iran an lawm lo.

𝗜s𝗿𝗮𝗲𝗹 𝗠𝗼𝘀𝘀𝗮𝗱 𝘁𝗲𝗻 𝗵𝗹𝗮𝘄𝗵𝘁𝗹𝗶𝗻𝗴 𝗮𝗻 𝗶𝗻 𝘁𝗶:

Israel spy chhuanvawr Mossad spy agency director David Barnea chuan Israel-in Iran a beiha a hlawhtlinna chu an lo ruahman lawk (plan) aia nasa leh hlawk fê a nih thu a sawi a. "Iran laka Israel venhimna tur kawngah thui leh thûk takin hmasawnna kan neih phah a ni," tiin ni 12 indona an chhawrzia a sawi.

𝗖𝗡𝗡 𝗿𝗲𝗽𝗼𝗿𝘁𝗲𝗿 𝗯𝗮𝗻 𝗽𝗵𝘂̂𝘁:

US President Donald Trump chuan CNN thuneitute chu an Correspondent Natasha Bertrand chu ban (fired) turin Truth Social-ah a ziak leh ta hmiah mai. Trump chuan Natasha-i hian 'fake news' a puangzar tiin, US-in Iran nuclear hmun 3 a chhut chimih vek chu "chhe mang lo leh thla rei lo tea din thar leh theih a ni," tia CNN-a dâwt a report avangin bàn turin a ti a. "Uicho angin paih rawh u," a ti hial.

Trump hian Natasha-i hian a taka ral beitute dinhmun hre lo leh zah lovin camera phenah khawvel hmuhah dawt a report a, hei hi ram hmangaihtu pilot te zahlohna a ni, 'FIRE NATASHA!' a ti pawp mai.

𝗜𝗿𝗮𝗻 𝘂𝗿𝗮𝗻𝗶𝘂𝗺 𝘁𝗵𝗹𝗶𝘁𝗳𝗶𝗺 𝗸𝗴 400 𝗸𝗵𝗮𝘄𝗻𝗴𝗲:

US-in Iran nuclear hmun 3 a beih hma hian nuclear siamna atana an thlitfima an tihchak mêk uranium kg 400 chu lak bo a ni a, US leh IAEA pawhin a awmna hi an hre zui ta lo. Enriched uranium kg 400 hian nuclear bomb 10 lâi a siam theih niin an sawi. UN nuclear agency Rafael Grossi chuan IAEA hian Iran-in an dahna hi an chhui zui hleithei tlat tawh lo, a bo emaw, an thukru chu kan ti lo, a ti a. US chuan Iran nena inbiaknaa chinfel an beisei thung.

𝗙𝗿𝗮𝗻𝗰𝗲-𝗶𝗻 𝗶𝗻𝗯𝗶𝗮𝗸𝗻𝗮 𝗯𝗮𝘄𝗸 𝗮𝗻 𝗻𝗴𝗮𝗶 𝗽𝗮𝘄𝗶𝗺𝗮𝘄𝗵:

France President Macron chuan tuna Israel-Iran inkahhai hi a derthawng rih hle thu a sawi a. France President chuan Iran nuclear inbiakna hi; Iran, US leh European Union ten an neih chhunzawm theih ngêi leh nan hma lâk a ngaih thu a sawi.

𝗜𝘀𝗿𝗮𝗲𝗹-𝗶𝗻 𝗚𝗮𝘇𝗮 𝗮 𝗯𝗲𝗶 𝗻𝗴𝗵𝗮𝗹:

Israel hian Iran nena inbeih an chawlh rual rual hian Gaza strip lam a bei ve leh nghal a, Palestinian 68 vel a tihlum a, aid worker an thi tel nual niin report a ni. Turkey President Erdogan chuan Israel-in Gaza a beih leh chuan inremna a tluantling thei lo ang a ti.

(𝙺𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝚕𝚎𝚑 𝙰𝚕 𝙹𝚊𝚣𝚎𝚎𝚛𝚊 𝚊𝚝𝚊𝚗𝚐𝚊 𝚕𝚊𝚔 𝚔𝚑𝚊𝚠𝚖 𝚊 𝚗𝚒 𝚎)