SAIRANG LEH HORTOKI INKAR RAILWAYS SPEED TRIAL A HLAWHTLING - Vanneihthanga
Rauthla 04.06.2025 (Nilaini) : Vawiin June ni 4, 2025 khan Sairang railway station leh Hortoki inkar (15km vel)-ah speed trial tluang taka neih a ni.
He speed trial an neih tur hi vawiin khan theih ang anga cover theih inbeiseiin Sairang lamah kan chhuk ve a. An trial run neihah hian, mipui lamin rintawkna an neih lehzual beiseina avangin chuan ve kan han dil ve ngawt a. Mahse, an hotu sangte atanga an ruahmannaah midang reng reng tel ve rem an lo ti lova, thawktu dang engineer te thleng pawhin tumah speed trial run-ah hian tel ve a lo rem lo a ni.
Vawiin khan Sairang kan thlen thlakin bungraw phur wagon train thui em em mai Sairang station atang hian a lo tawlh tan mek a. He bungraw phur hi muangchanga tawlh phei zelin Mualkhang station-ah a ding ta a. Hengte thleng hian tih chhinna vek a lo ni a. Tichuan speed trial chu darkar khata KM 35 vela chakin rail wagon, bungraw phur tho, sei tham tak mai chu an han tlan chhin ta phawt a. Chumi hnuah rail head (Rel lu) chauh, engmah dang hnuk lovin, Sairang atangin 50 kmph (darkar khata km 50 a chak) in a tlan ta a. Hortoki tluang takin a thleng a. Hortoki atangin Sairang panin 80 kmph in a tlan leh a. An lo ruahman lawk, 110 kmph-a tlan chu nidang hun remchanga tih leh turin an khek ta rih a ni.
Speed trial an neih hi an uluk hle mai a. A bik takin leiverh leh lei (bridge) awmna hmunah duty an indah vek a. Rail head a tlan zawh hnuah, trolley hmangin an umzui a, thil chhia emaw, rail kawngah danglamna a awm leh awm loh an enzui a, vawiina speed trial run an tih chinah an lungawi tawk hle niin thudawnna chuan a sawi.
