C.Hranghluna Memorial Inter Branch Football Tournament 2025 - Lawngtlai Vengpui Branch te an champion

Rauthla 22.July,2025 (Thawhlehni) : Nimin khan C.Hranghluna Memorial Inter Branch Football tournament chu khelh zawh a ni ta a. YLA Golden Jubilee Inter Branch Football tournament a Champion team Lawngtlai Vengpui chuan Chandmary Branch YLA te chu 2-1 a hnehin Champion nihna an hauh leh ta.

    Game khelh tan tirah atangin inkhelh a hmuhnawm hle a. Chandmary lam hi tun tumah chuan inbuatsaihna nei tha ber an ni ang, tih theih tur an ni a. Player pawh kum lama naupang te te an nei a. Experience player erawh an nei tam lutuk lova. Nimahsela, an game erawh a hmuhnawm tak zet a, an fitness leh team combination pawh a tha hle a. Engkim ah an chungnung zawk tih theih tur an ni. Chutihrual chuan, Lawngtlai Vengpui chu Football ah chuan an mahni tluk tu an la awm thei meuh lo chu a ni. An defender leh an hmatawng te an tha hle a. Midfield lamah erawh an nawi hle thung. Chuti chung chung chuan Champion engtin nge an nih theih kan tih chuan, experience player an nei tha a, an game fight a tha hle tih a hriat theih a ni.

            Kan sawi tawh angin Chandmary lam hi chungnung zawk angin lang mahse, an goal khungtu ber Lalzirliana khelh theih loh zar an zo a, goal khungtu tha an neih loh an tuar a. An goal chance neih tam tak an khung lo tih kan hmu a, hei hian Lawngtlai Vengpui goalkeeper thatzia leh tlo zia an pholang kan ti lo thei lovang. Tin, Lawngtlai Vengpui pawhin goal chance an hloh nual bawk a. Chandmary defender te kum lama naupang zawk te an ni a, tun tum tournament ah chuan inkawp fuh pawl tak an ni ngei ang le.

Best player atan an thlan tak Titus-a Chandmary player hi a fakawm hle mai. A thawhhlawk hle mai a, ani kha awm ta lo se, goal hnih aia tam a lut mai lovang maw tih theih tur ani a. A hmalam hun a eng hle a, theihtawp han chhuah zel teh se. Top Scorer Lalzirliana erawh Final ah a hmel kan hmu thei lova, ani kha awm ta se, Vengpui defender te an tla buai ve ngawt in a rinawm a, a khel thei lo kha Chandmary in an tuar ani ber e. Lawngtlai Vengpui goalkeeper hi Best goalkeeper ah thlang ta lo se, a fair lo kan ti viau ang. A thlangtute hian an thlang fuh chiang e.

        Chandmary lam - An Game set up a fuh, tun tum tourney a an Key Player Zirliana kha Coach in a hmang tangkai thiam hle mai. Centre back (tun hma tawngkam) ni thin kha Goal Scorer tur atan a chherchhuak daih mai a, coach pawh a fakawm hle mai. Chandmary game a hmuhnawm hle mai. Bazar Branch nen an match kha tlemin set up fuh tawk loh avangin an che chhe tep hman a, a bak an game zawng zawng kha chu solid khawp mai. Eng positioning ah pawhnise tun tournament na na a chuan hmana Chandmary vanglai ai pawhin an Game a hmuhnawm hle. Mahse, ka han ti leh te ang Final ani a, infiamna a vannei leh vanduai baka khel chhiat leh thatni te pawh a awm thin a, Final ni erawh an khel that leh ni ani tlat mai a, mahse, sawi tawh angin Goal thuntu ber additional/Substitute Player hriam tawk an neilo kha a pawi hle mai.

            Vengpui hi mak deuh maiin Major tournament a team tha tak angin anlo insiam hman tlat zel thin hi Lawngtlai mipui mak ti an tling ngei mai. An Team blending pawh a fuh khawp mai, Experience players leh Kum naupang te te hardwork players anlo kawl nual niin a lang. Tin, Vengpui team ten an Opponent Chandmary Game an hrechiang hle mai a, Defence atangin mawi taka an passing chho a, set piece siam an tum thin kha Goal area thlen hmain an thiat hman deuh vek zel thin a, First half a Goalkeeper saves nei kha a bawn khawp mai.. Players ball inchuh luaih luaih kar atangin ball a rawn dawk zawk kha Cross Bar chunga a nam hman te kha a mit a chak hle tih a hriat thei bawk e. Ball Possession a chhe zawk mahse an team strength an hrechiang a, Chandmary Goal area a second Half ah khan ball hlauhawm vawi-3 lai mai an siam hman tlat ani. Tin, Lawngtlai Players ina kan tlakchham Long Rang shot vawikhat anlo nei te kha a tha takzet ani

Champion team hian Cheng nuai khat bakah Trophy leh Certificate an dawng a. Tin, bawng pawh an dawng tel bawk a ni. Pahnihna hian cheng singnga, trophy leh certificate an dawng a. Pathum-na Kawlchaw West hian cheng singhnih, tophy leh certificate an dawng bawk a ni.

He tournament khelh chung a goal 12 khungtu Lalzirliana Chandmary chu top scorer a ni a. Best goalkeeper ah Lawngtlai Vengpui goalkeeper Joseph HC.Lalrindika thlan a ni a, Best player ah Lawngtlai Chandmary defender Titus Rosanglura thlan a ni a. Fair Play hi Lawngtlai Chandmary Branch hnenah hlan an ni bawk.