LAWNGTLAI BAWRHSAPIN LAWNGTLAI DISTRICT ARM WRESTLING ASSOCIATION HNENAH 'ARM WRESTLING TABLE' HLAN
Rauthla 22nd July, 2025 : Vawiin khan Pu Cheemala Siva Gopal Reddy, IAS, Lawngtlai Bawrhsap leh Chairman, Lawnglai District Sports Committee, nibawk chuan Lawngtlai District Arm Wrestling Association - hnenah 'Arm Wrestling Table' hlanna a nei.
Bawrhsap Office kawtzawla 'Arm Wrestling Table hlanna neihah hian thu sawiin Pu Cheemala Siva Gopal Reddy chuan Lawngtlai District Arm Wrestling Association - te chu pawl naupang tak nimahsela hlawhtlinna an chan a ropui hle a ti a. Lawngtlai District Arm Wrestling Association Member atanga Mizoram Level - a 'Gold Medal' leh National Level- a 'Bronze Medal' la thei an awm hian an thawhrim zia tilang chiangin, pawl dang tan pawh entawntlak tak an ni, a ti. Bawrhsap chuan vawiina hlan tak 'Arm Wrestling Table' pawh tangkai taka hmang tura chahin, infiamna hmanga Lawngtlai District leh Mizoram tihmingthatu ni zel turin duhsakna a hlan nghal bawk.
Lawngtlai District Arm Wrestling Association- hnenah hian 'Sports Promotional Fund' atanga cheng 20,000 sênga lei 'Arm Wrestling Table' pahnih ( 2) hlan a ni a. Vawiin hun hmannaah hian Lawngtlai District Sports Committee Member leh Lawngtlai District Arm Wrestling Association Member - te an tel thei a ni.
Lawngtlai District Arm Wrestling Association- hi kum 2024 khan din niin, tun dinhmunah hian Member- 100 bawr vel an awm mek a ni.
