Integrated Financial Management Information System (IFMIS) atan kum sarih chhungin cheng vbc. 35.74 a sêng

 Rauthla 17.July,2025 (Ningani) : Mizoram sorkar chuan sorkar hnathawk leh bill hrang hrangte online hmanga buaipuina Integrated Financial Management Information System (IFMIS) atan kum sarih chhungin cheng vbc. 35.74 a sêng.

        RTI Act hmanga zawhna Finance department-in an chhàn danin, IFMIS Portal hi Mizoram sorkar hnuaia departmentte tan September 1, 2021 khan hman tan a ni a, tihhmasawn (develop) chhoh zel a ni. IFMIS siamtu tur zawnna atan tender chhuah a ni a, Finance department (FMU) chuan IFMIS siam turin ITI India Pvt. Ltd. leh Interlace India Pvt. Ltd. te inremna a ziahpui a ni.

IFMIS hi Finance department hnuaia Fiscal Management Unit (FMU)- in an enkawl a, system integrator lamin Treasury-ah helpdesk an dah thung. An helpdesk-ah hian sorkarin a hranpain thawktu a dah lo. IFMIS admin operator atan Interlace India Pvt. Ltd.-in thawktu an dah a, Mizoram sorkarin payment chu ITI/Interlace hnenah contract term-a payment milestone anga pek an ni a, chu chu an hnathawkte an pe ve leh thin.

IFMIS atana sum hman tam ber kum 2019-20 khan cheng vbc. 8.87 hman a ni a, hman tlem ber kum 2023-24 khan cheng nuai 79.04 hman a ni. IFMIS atan hian kum 2019-20 atangin kum tin sum sên a ni a, chawhrualin kum tin cheng vbc.5.10 sorkarin a sêng thin ang a ni.

IFMIS ATANA SUM HMAN DAN

2019-20 : Rs 8,87,57,605

2020-21 : Rs 4,98,93,696

2021-22 : Rs 3,13,45,971

2022-23 : Rs 3,99,67,430

2023-24 : Rs 79,04,423

2024-25 : Rs 5,96,76,023

2025-26 : Rs 7,89,60,748