Thla 6 chhungin lirthei 14,911 ziak lut - Lawngtlai ah lirthei 499 inziak lut an awm

 Rauthla 17.July.2025 (Ningani) :  Transport department chuan kumin kum chanve, January-June chhungin lirthei 14,911 an ziak lut thar a, Aizawl district-ah a tam ber. State Transport Authority (STA)-in Mizoram hmun hrang hranga sumdawnna lirthei awm zat leh mipui mamawh dan zirchianna an zo tawh a, STA thutkhawm leh hunah pharh an tum.

        Transport department atanga thu dawn danin, kumin January-June thla chhung khan Mizorama district transport office pariatin lirthei chi hrang 14,911 an ziak lut (register) thar a; lirthei registration tih thar zinga 10,828 chu Aizawl DTO huam chhunga mi niin, lirthei ziah luh zawng zawng atangin 72.62% a tling. Kumin 2025-ah April thla khan DTO pariatah hian lirthei 2,876 ziah luh thar a ni a, thla ruk chhunga lirthei ziah luh tam ber thla a ni.

STA hotute chuan, public transport vehicle hrang hrang - taxi, two wheeler taxi, auto rickshaw leh bus zirchianna an kalpui chu an zawh tawh thu an sawi a, "Mizoram hmun hrang hranga public transport-te hian service theihna hmun (domain) an nei theuh a, an awmna bial chhunga public transport awm zat leh a hmangtu mipui awm zatte kan zir chiang. Zirchiannain a tum ber chu mipui mamawh aia tam public transport a awm leh awm loh hriat a ni," an ti.

Public transport zirchianna chu STA thutkhawm leh hunah pharh theih an inbeisei thu sawiin STA hotute chuan, "STA hi kumin first quarter (April-June) atan kan thukhawm tawh a, second quarter (JulySeptember) atan kan la thukhawm lo. thutkhawm leh hunah kan zirchianna pharh thei turah kan inngai," an ti a; zirchianna atanga an thil hmuhte kalpui zel dan tur chu STA kutah a awm tih an sawi. 

Transport minister Vanlalhlana chuan April 10, 2025-a Mizoram Maxi Cab Owners' Association General Assembly vawi 17-na a hmanpuinaah, mihring phur sumdawnna lirthei (public transport) permit dil an tam thu leh mipui mamawh mila permit pek a nih tawh dawn thu te, STA-in Mizoram hmun hrang hranga mihring phur sumdawnna lirtheite an zir chian mek thute a sawi a ni. ut; Sumdawnna lirthei dinhmun zir chian mek thute sawi a ni.

        Lawngtlai District bikah hian tun kum chanve chhung hian lirthei 499 inziak lut an awm a. Heng zinga tam ber chu Mahindra Maxx (Extra long) hi a ni.