Rauthla 17.July,2025 (Ningani) : Vawiin July 17, 2025 hian District Volleyball Association Lawngtlai (DVAL) te chuan an Kum 25-na (Silver Jubilee) lawmna LADC Conference hall ah an nei a. Pu C.Ngunlianchunga, Lawngtlai West Bialtu MLA chu khuallian niin hun a hman pui.
Khuallian Pu C.Ngunlianchunga MLA chuan, District Volleyball Association Lawngtlai ten Silver Jubilee hun hmang thei a, a lawmna an buatsaih thei chu lawmawm a tih thu a sawi a. Tunlai hmasawnna hrang hrangin thalaite min run mek a, chu hmasawnna chuan sual nasa tak a rawn ken lut bawk a. Chuvangin, infiamna hmanga sual kan do hi a ngaih tawh avangin hruaitute pawh tan la thar turin a chah a. Hruaitu nih hi mahni mimal hamthatna atan hmang lo ila, in tih larna hmanrua atan hmang lo bawk ila. Nihna leh lansarh duh avang pawl hruaitu nihna chuhtute hian engti kawng mahin an kaihhruai te hma an sawi pui ngai lova, engtin nge midangte kan chawisan ang a, an tan malsawmna kan nih ang, tih hi pawl hruaitu chuan kan ngaihtuah reng tur a ni. Chumi tur chuan DVAL hruaitute pawh rilru thar pu a, tan la thar zel turin a sawm a ni.
Pu C.Ngunlianchunga chuan, tuna kan ram dinhmun kan thlir hian rinawmna leh dikna kan tlachham ta hle mai. Kan ram rorelna in kan hmuh hian thalaite hian ngaihtuahna thar kan neih a, kan ram hian hmangaihtu tak tak a mamawh tawh tih hria a, ram Hruaitu te dik lohna ringawt ngaihtuah lova, mipuite pawh kan insiamthat a hun tawh, kan ram hi kan vei a, ram leh hnam siamthatna kawng ah thalai te theihtawp kan chhuah a ngai ani, a ti bawk.
Pu C.Ngunlianchunga chuan khawvel hmasawnna avangin kan ramah malsawmna tam tak kan dawng mek zel a. Kan ram neih atang te in zangnadawmna te nasa takin kan hmu bawk a. Chutiang karah chuan ram pawh nei mumal lo ten, zangnadawmna a kal dawn tih hria a, ram pass in siam duh tlat kan awm te hi a pawi hle a. Malsawmna kan dawn te hi anchhia ah kan chantir ang tih a hlauhawm tak zet a ni, a ti a. Kan ram hian hmangaihtu tak tak a mamawh a, khawtlang hruaina kawngah VC thenkhatte chuan NREGS sum ringawt kan buaipui ni te pawhin sawi a awm ta zel a, a zahthlak takzet a ni, a ti.
District Volleyball Association, Lawngtlai ten Silver Jubilee an lawmna ah hian Mizoram Volleyball Association atangin hruaitu pali ten hun an rawn hman pui a. Tin, DVAL founder President Pu C.Hrangthianga pawhin thusawina neih bawk a. Hruaitu hlui te chawimawina thuziak hlan an ni a. Lawngtlai District Football Association te pawhin lawmpuina thuziak an hlan bawk a ni.
