Rauthla 18.July, 2025 (Zirtawpni) : Nimin khan Pu PC.Lalchunglura MPS, Superintendent of Police Lawngtlai chuan Mizoram Journalist Association Lawngtlai member-te zanriah kilpui ah a sawm a. Lawngtlai District chu ramri hrul a awm kan ni a, khawpui thang chho mek kan ni bawk a. Chuvangin, dan leh thupek kenkawhna kawng ah boruak tha leh ralmuang a awm theihna turin Chanchinbumite thawhpui atan a sawm a ni.
Pu PC.Lalchunglura chuan, chanchinbumite chu ram tana hnathawktu pawimawh tak in ni a. Ram mipuite zirtirna tha pek kawngah pawh a thawhhlawk ber te in ni a, hemi kawngah hian Police te nen thawhhona tha tak kan neih a ngai a ni, a ti a. Ram mipuite’n dan leh thupek an zawm theihna tur kawngah police ten hna tha tak mipuite tan an thawh theihna tura tan lakpui an ngaih thu te, mipui sukthlek leh kaldan khalhngil na kawngah mi tangkai ber te chu chanchinbumite hi i ni a. Keini tel lo hian in kal thei ang a. Mahse, police te hi chanchinbumite thawhpuina tel lo chuan hnathaw a chak tak tak thei lo a ni, a ti. Chuvangin, dan leh thupek kawngah te, ram venhimna kawngah te leh mipuite nen thawhhona tha tak a awm theihna tura thawhpui an ngaihthu MJA member te chu lo hrilh in, theihtawp chhuaha thawhpui zel turin a sawm bawk a ni.
MJA Lawngtlai District hruaitute pawhin thusawiin, Police te nen tun aia tha a thawhhona neih a tul thu leh Police station leh outpost a thawkte pawhin mipuite hriattu puanzar kawng ah inthlahrung lo a, a tul ang anga MJA te chu an tan an awm reng thu te, Lawngtlai traffic police dinhmun te chu ennawn a, tun aia tha leh hmasawnna tha zawk an neih theihna turin SP leh a thawhpui te chu hma la turin an ngen bawk a ni.
Lawngtlai SP in Chanchinbumite zanriah a kilpuina ah hian SP hi Additional SP bakah District chhunga Police hotuten tawiawmin, 3rdIR Battalion Commandant Pu C.Vanlalvena pawn zanriah hi a kilpui a ni.
