Rauthla 23.July, 2025 (Nilaini) : Rauthla Newspaper chuan Lai Autonomous District Council a Group B post hnawhkhah loh post engzat nge awm, eng post te nge tih RTI hmanga zawhna chhanna chu - Lai Autonomous District Council ah hun eng emaw kalta atang khan Group ‘B’ post lak theih loh in a awm reng a. Tun dinhmun ah hian post ruak 11 hnawhkhah loh a awm mek a. Chungte chu Circle Education Officer (M/S) post hnih, Circle Education Officer (P/S) post 4, Asst.Account Officer post khat leh Range Officer (F) post 4 te an ni.
RTI zawhna ah hian post ruak lak loh te hlawh tur hi Budget ah dah a ni em? Ni ta se, engzat nge tlingkhawm a, chung chu khawiah nge hman a ni tih zawhna chhanna chu - Heng post 11 lak loh te hi Lai Autonomous District Council Budget ah dah vek a ni a. Group ‘B’ Officer post ruak te kumkhat chhunga an hlawh mamawh tur zat hi Rs 92.10 lakhs a ni a. Tun kum kal mek ah hian First quarter bik atan Rs 6.13 lakhs chu ruahman a ni a. Heng te hi State Finance Department atangin sanction a ni a, post ruak anih avangin an hlawh hi pek tur an awm loh avangin Leave salary ba ah Rs 6.12 lakhs chu hman a ni.
Rauthla RTI zawhna March 2025 - May 2025 chhungin Lai Autonomous District Council ah MR a hna lak an awm em? tih zawhna chu - Kumin March - May thla chhung hian MR 68 lak an ni a. Heng mi 68 atang hi Fixed pay a lak vek an ni a. A hlawh tam ber hi thla khat ah Rs 12,600 niin Lai House Security a thawk pali leh Computer operation (Sanitation Dept) a thawk te an ni a. Thla khat a an hlawh senso zat chu Rs 63,000 a ni a. Tin, Rs 11,400 hlawh la tu te hi mi 17 an ni a. Driver pasarih leh Lai House a thawk mi 10 te an ni. Thla khat a an hlawh senso zat tur chu Rs 1,93,800 niin, a bak mi 46 te hian Rs 8,000 an hlawh ve thung a, thla khat a an hlawh tur senso zat chu Rs 3,68,000 a ni a, Sanitation Workers te an ni deuh tlangpui a. Heng MR atan an lak mi 68 te hlawh thla khat a an pek chhuah zawng zawng zat chu Rs 6,24,800/- a ni. Sanitation workers leh Lai House a thawk tih loh chuan tun thla thum chhung hian MR lak an awm lo
Heng zawhna te hi GAD kaltlanga zawhna siam te a ni a, a tam zawk hi chu Finance Department kaltlang a chhanna kan hmuh te an ni.
Finance & Account Department, LADC a RTI zawhna Rauthla Newspaper in a siam erawh tun thlengin chhanna la hmuh loh a ni a. Thla khat a ral hnu a chhanna a awm loh chuan a aia sang zawk ah zualko ani ang.
