CADC 7-Kamalanagar West By Election pawh tluang taka neih zawh a ni ta
Rauthla 08.08.2025 (Zirtawpni) : Chakma Autonomous District Council huam chhunga Kamalanagar ‘West’ By-Election chu nilaini khan boruak muanawm tak hnuaiah neih a ni. Kamalanagar West MDC Constituency a polling station pathum ah hian voter 1773 awmin mipa 883 leh hmeichhia 890 an awm mek a ni.
Bialtu MDC Sanjeev Chakma thihsan tak Kamalanagar ‘W’ MDC Constituency ah hian Polling Station 3 awmin, By-Election ah hian chuhtu Candidate 4 an awm a, ZPM Party candidate Pu Dinesh Moy Chakma, BJP Party Candidate Pu Joydeep Chakma, MNF Party Candidate Pu Rupyan Chakma leh INC Party Candidate Pi Kalpana Chakma te an ni.
7-Kamalanagar West ah hian Polling Station pathum a awm a. Kamalanagar-IV ah hian Vote 1109 awmin mipa 554 leh hmeichhia 555 a ni a. Heng zingah hian mipa 491 leh hmeichhia 496 ten vote an thlak a. Vote awm zawng zawng atangin 89% a tla a ni. Saizawh West polling station ah hian vote 347 awmin mipa 162 leh hmeichhia 185 an ni a. Heng zinga mipa 132 leh hmeichhia 135 ten vote hi an thlak a, vote awm zawng zawng atanga chhut in 76.95% vote thlak a ni. Tin, Rajmandal ah hian Vote 317 a awm a. Mipa 167 leh hmeichhia 150 te vote thlak thei an ni a. Chung zinga mipa 150 leh hmeichhia 133 ten vote hi an thlak a ni a. Vote thlak thei atanga chhutin 89.27% ten Rajmandal ah hian vote hi an thlak a ni.
CADC a by-election neih zawh takna 7-Kamalanagar West ah hian Vote 1773 awmin mipa 883 leh hmeichhia 890 an awm mek a. Vote thlak thei 1773 atangin vote tla zawng zawng hi 1537 a ni a. Mipa 773 leh hmeichhia 764 ten vote hi an thlak a. Vote awm zawng zawng atangin 96.69 vote hi a tla tihna a ni. Vote thlak zawh a nih hnuah EVM te hi Lawngtlai pan pui nghal a ni a.
Vawiin ah Vote chhiar ani a. ZPM Candidate Pu Dinesh Moy Chakma chu tling a puan ani.
Chakma Autonomous District Council (CADC) a Kamalanagar West bialtu MDC, Pu Sanjeev Chakma boral avanga State Election Commission (SEC) ruahmannaa by - election neihah, Pu Dinesh Moy Chakma ( ZPM) chuan Vote- 724 hmuin thlantlin a ni.
By - election ah hian August 6 ( Nilaini) zing dar 7:O0 AM atang a tlai lam dar 5:00 PM thleng khan vote thlak a ni a. Inthlannaa vote tlate hi vawiin khan DC Office Lawngtlai, a Counting Hall - ah chahwma dar 10 atang khan chhiar a ni. Candidate- te vote hmuh dan chu a hnuaiah hian tarlan a ni.
1. Joydeep Chakma (BJP) : Vote - 715
2. Kalpana Chakma (INC) : Vote - 21
3. Rupayan Chakma (MNF) Vote -74
4.Dinesh Moy Chakma ( ZPM) : Vote- 724
5. NOTA: Vote- 3
Pu Cheemala Siva Gopal Reddy, IAS, Lawngtlai Bawrhsap leh Returning Officer, nibawk chuan Pu Dinesh Moy Chakma ( ZPM) hnenah hian 'Certificate of Election' a hlan nghal a ni.
