Rauthla 08.08.2025 (Zirtawpni) : Vawiin khan Gauhati High Court, Aizawl Bench chuan Lai Autonomous District Council chungchang a thutlukna chu a puang ta a. Karhnih chhungin Floor test nei tura tih a ni.
Lai Autonomous District Council chungchang hi Gauhati High Court, Aizawl Bench ah hian vawi li zet ngaihtuah a ni a. Ukil ten court a an thu thlen hrang hrang te ngaihthlak anih hnu ah Pu V.Zirsanga Larsap in CEM atan a pawmna chu Floor Test nei turin thutlukna a siam ta a. Floor test hi LADC a Chairman in Vawiin 08.08.2025 atanga chhiar in karhnih chhung ngeiin session hi a ko tura tih a ni. Hemi chhung hian Pu V.Zirsanga hian a thlawp tu a nei em tih finfiha a ni ang.
LADC a Chief Executive Mermber lo ni tawh, tuna ZPM, MDC nilai Pu V.Zirsanga chu kumin February 27 khan CEM atan lakluh niin, a kaihhruai LADC a ZPM Sorkar chuan Budget Session pawh kumin April 17 atanga 22 chhung khan neiin, Budget pawh passed a ni a, Budget erawh dan kalh a passed ni a sawiin Governor in a pawmlo.
Hemi hnu hian BJP leh MNF ten an din United Democratic Alliance chuan LADC ah Sorkarna an siamthei tih Governor hnena an thlen hnu ah an hruaitu M.Kawnpui bialtu MDC, BJP hruaitu Pu N.Zangura chu kumin May 8 khan CEM atan lakluh a ni.
ZPM Sorkar a CEM Pu V.Zirsanga chuan CEM atanga paih a nihdan ah dan palzutna a awm ni a hriain, dikna humhim a nihtheih nan hma la turin High Court ah a thlen a, Gauhati High Court, Aizawl Bench chuan he thu hi kumin May 15, June 10, July 16 leh vawiin July 23 ah te an ngaihtuah a, thu tlukna mumal tak court in a rawn tichhuak thuai tura beisei ani.
High Court thukallai a awm vangin LADC ah hian Sorkar mumal a kalthei lova, tuna CEM nilai Pu N.Zangura pawh hna thawk theilovin dah mek a ni a, thawktute hlawh erawh pek ani a, a bak budget a awm loh avangin hna tak tak thawh theih ani lo ani.
Gauhati High Court Aizawl Bench chuan LADC chief executive member (CEM) atana N Zangura, BJP ruatna chu hnâwl (cancel) a, Larsap Gen. VK Singh thutlukna anga CEM atanga chawlhtir tak V Zirsanga chu CEM ni zui turin a ti. V Zirsanga kaihhruai LADC sorkar chu High Court order chhuah atanga chawlhkar hnih chhunga fiah (floor test) turin a ti bawk. Heng chungchangah hian High Court chuan vawiin Aug. 8, 2025 hian order a siam a ni.
