MI 23 TE'N BJP AN ZAWM THAR.
Rauthla 22.Aug,2025 (Zirtawpni) : Vawiin 22nd August, 2025 (Friday) hian BJP Mizoram State Office, Mipui Rûn, Upper Republic-ah Friday Political Session hun neih niin, Pu K. Changliana'n inkhawm a kaihruai a, Pu Devesh Kumar, MLC & BJP Mizoram State Prabhari-in BJP zawm thar lawmluhna hun a nei a, State President Dr. K. Beichhua, MLA-in thu a sawi bawk.
State Prabhari Pu Devesh Kumar chuan, "mi 23 lai maiin BJP an rawn zawm hi a lawmawm êm êm a, khawvela chhungkaw lian ber BJP Family-ah lawm takin ka lo lawmlut che u a ni," a ti.
Pu Devesh chuan, "BJP Mizoramin kartin deuhthaw mi thar kan lawmlut a ni tih Social Media kaltlangin ka lo hria a, a lawmawm hle a ni. Mizoramah pawh political party hrang hrang an lo sorkar tawh a, vawiinah hian Mizoram hmun hrang hrang kan tlawhkualnaah tih tur ṭhahnem tak a la awm a, BJP chauh hi hmasawnna ngai pawimawh tak tak tu kan ni tih hi Mizoram pawhin a la hmu fiah ngei ka beisei a ni," a ti a.
Sawi chhunzawmin, Mizoram enkawltu Pu Devesh-a chuan, "Sairang relkawng rawn hawng turin Prime Minister Narendra Modi chu September 13-ah Aizawl a rawn kal dawn a, Hmarchhak state-te hmasawnna ngai pawimawhtu a nih zia a lang chiang hle a ni, rel rawn lut tur hi hnam inchimralna tur ni lovin, hma kan sawn zelna atana khaw ṭha leh khaw chhe hnuaiah pawh englai pawha inkalpawhna ṭha kan neih theih rengna atana hmalakna kawng khat a ni," tiin a sawi bawk.
Dr. K. Beichhua, MLA State President pawhin thusawiin, "Mi 23 BJP rawn zawm thar kan neih te hian thutlûkna dik kan siam a ni," a ti.
Dr. K. Beichhua chuan, "eng vangin nge vawiinah hian Mizoram mipuite kan phun kan phun? kan tih chuan, ṭawngkam maia politics kan khelh ṭhin vang a ni a, inthlan dawnah kan Politician-te'n kan tih theih loh tur hmangin, tlin kan duh avangin mipui hmaah kan intiam a, hetihlai hian, keini BJP-te chuan dawt politics kan khel ve dawn lova, keini chuan kan ramin hmasawnna a hmuh theih nan a thawhin kan thawk zawk dawn a ni," a ti a.
Pu Beichhua chuan swi chhunzawmin, "vawiinah hian Mizoram mipuiin kan duhthusam development kan beisei leh, a tak rama kan awm dan hi a inpersan êm êm a, kan thusawi tawh te record ṭha tak leh media kaltlanga thu kan sawi tawhte chu haichhuah theih leh hmuh theihin a awm leh nghal zel ṭhin a ni, kan fimkhur a tha a ni," a ti bawk.
BJP-in Mizoramah hmasawnna a hmuh dan sawi bawkin, Pu Beichhua chuan, "Pastor Chhawna inlarnaah chhimlam aṭangin pangpar lo par tur thu a lo sawi lawk tawh kan hmu a, tunah chuan chhim lam aṭangin pangpar a par chhuak mek a ni tih ka hmu a, MADC-ah BJP a sawrkar a, LADC-ah BJP kaihhruai a sawrkar mek bawk a ni. CADC ah pawh BJP lian tak leh ṭha takin kan awm mek a, Lunglei khawpuiah pawh BJP rawn zawm tur a inmung mek a, vawiinah chuan BJP nih pawimawh zia kan hriain, BJP nih kan zak tawh lova, mi ṭhenkhatte'n BJP nih avanga Kristian lo tur emaw tia ngaihna an nei ṭhin a, kan hriat tur pawimawh chu; Isua min chhandamna hi BJP nih leh nih lohah a innghat lo a ni tih kan hriat a ngai a ni," a ti bawk.
