Rauthla 20.08.2025 (Nilaini) : Nimin August 19, 2025 zing dar 11:30 Am khan Pu T.Zakunga, Chairman LADC leh Nl.C.Biakthan-sangi Deputy Chairman te chuan Larsap hnenah banna an thehlut a. LADC a CEM in thlawptu a neih dan fiah theih a ni lo.
August 18, 2025 khan Pu N,Zangura, M,Kawnpui bialtu MDC chu Chief Executive Member atan rinawmna thutiam tir a ni a. Hemi ni vek hian Pu T.Zakunga, Chairman LADC chuan United Democratic Alliance hruaitu Pu N. Zangura chuan thlawptu a neih dan fiah anih theihna turin LADC Emergency Session a kova, tichuan session neih \an hma hian Pu C.Lallianzuala, Pu Lalramfawna leh Pi Z.Ngunchhini, MDC ten LADC Secretary Pu Lianchungnunga kaltlangin Larsap hnenah banna hi an tehluh avangin Session kaihhruai tur an awmloh vangin Pu N. Zangura dinhmun pawh fiah theih a ni lo a ni.
Pu T. Zakunga hi kumin March 26 khan LADC Chairman atan thlan a ni a, C. Biakthansangi hi April 22, 2025 khan Deputy Chairman atan thlan a ni.
LADC a UDA Sorkar piang chho mekah Chairman leh Deputy Chairman te an ban vang hian UDA lam chuan Governor hnenah Protem Chairman ruatsak turin ngen an siam a. Nimin vek khan Pu Lalthanmawia Colney (Nominated MDC) chu Protem Chairman atan ruatna lehkha hi tichhuah nghal a ni, Vawiin Dar 11:00 Am hian Additional DC Pu David Lalrinawma’n rinawmna thu tiam tirin a la lut ani ang
Nimin lama LADC a Chairman leh Deputy Chairman te an ban avanga sorkar thar chak tawk leh tawk loh fiahna (floor test) neih theih anih loh hnu-ah Sakeilui bialtu MDC Pu Tuturu Singh chuan ZPM chhuahsanin BJP a zawm. Nimin khan Pu Tuturu Singh hian President BJP, Lawngtlai District hnenah BJP a zawm thu ziakin a thehlut nghal. Tun dinhmun ah hian United Democratic Alliance ah hian Elected MDC 15 leh Nominated MDC pakhat an awm mek ah Opposition lamah hian ZPM MDC 10 an awm mek bawk a ni.
