Pu V.Zirsanga CEM LADC chuan CEM anihna atangin banna Governor hnenah a thehlut

 Pu V.Zirsanga CEM LADC chuan CEM anihna atangin banna Governor hnenah a thehlut

Rauthla 14.Aug,2025 (Ningani) : Vawiin August 14,2025 zing Dar 10:30 Am khan Mizoram Governor in thu a pek angin, Gauhati High Court in LADC a CEM ni zui tura a tih Pu V.Zirsanga kaihhruai LADC sorkar chu buk tura tih anih avangin, LADC session chu koh a ni ta a. Lai Autonomous District Council Chairman Pu T.Zakunga kaihhruaina hnuaiah session hi neih a ni.

Session neih tan a ni a, Chairman Pu T.Zakunga chuan Governor atanga lehkha an hmuh te chu chhiar chhuak in, session an neih chhan te a sawi a. Hemi hnu hian Pu V.Zirsanga, CEM LADC chuan tukin (14.08.2025) zing dar 10:00 Am khan  CEM atanga banna Governor hnenah LADC Chairman kaltlangin a thehluh-na thu chhiar chhuah a ni ta a.  CEM Pu V.Zirsanga kaihhruai sorkar chu buk tura tih anih lai a, amah berin banna a thehluh tak avangin Pu V.Zirsanga kaihhruai Executive chu a tla tih a puang ta a ni.

        Pu T.Zakunga, Chairman chuan Session tih tawp hma in member te tana hriattur thu tawi a sawi a.  LADC in CCB Rules kan nei a, dan hmangin hun hmasa lamah rorelna kalpui a lo ni tawh thin a, member nei tam apiang in Sorkar-na an chang thin a ni. Nimahsela, tun tunah Sokar mumal lovin hun rei tak kan kal hi a pawi hle a, tuna Member-te hian ram mipuite  demna kan tawk nasa hle a, pawi ka ti tak zet a ni. Hotute hi Pathian ruat an ni a, chuvangin, Pathian in min ruat angin rinawm takin awm tawh i la, mipui leh kan Lairam tan kawng tha i zawh hram hram ang u, tiin member-te a sawm a ni. LADC Chairman chuan  tiamchin awm lovin Session a ti tawp zui nghal. 

February ni 24, 2025 khan Pu V. Zirsanga chu LADC CEM atan ruat a ni a, Governor chuan ni 30 chhungin House-ah member a ngah tâwk em tih fiah turin a hriattir zui a. Mahse, fiahna neih theih a ni ta lova. Hetihlai hian Pu N. Zangura chuan UDA Sorkar a siam theih thu Governor a hriattir a, Governor chuan May ni 2, 2025 khan Shri N. Zangura chu CEM thar atan a ruat a. Pu V. Zirsanga chuan High Court-a thu buai a theh lut ta ani. August ni 8, 2025 khan High Court  chuan Pu V. Zirsanga hi kar hnih chhungin floor test a nei tur a ni tih leh kum 2025-2026 budget chu awmze neilo ani tih a lo puang tawh a ni.