Infiammite’n hlawhtlinna tak tak nei tur chuan ruihhlo laka fihlim hmasak phawt a ngai - Pu Donny Lalruatsanga, DC Lawngtlai

 Rauthla 29.October, 2025 (Nilaini) : Nimin khan Lawngtlai District Bawrhsap leh District Sports Committee Chairman nibawk Pu Donny Lalruatsanga chuan tun hnaia Mizoram State Sports Council ten Mizoram Arm Wrestling Championship leh  Mister Mizoram 2025 thlanna a Lawngtlai District aiawha kal Medal rawn hawn te pualin a Office Chamber ah thingpui inhona leh inkawmhona an nei.

Pu Donny Lalruatsanga chuan, tunhnai ah Lawngtlai District te Infiamna lamah nasa takin hmasawnna kan nei chho mek zel a. Hei hi Infiammite inpekna anih rual in, hruaitute inpekna leh thawhrimna avang a ni, a ti a. Infiammite pawhin tun aia nasa lehzuala tan la thar a, District aiawh mai ni lova, State leh National aiawh thlenga tel tura inbuatsaih a, hlawhtlinna chang chhunzawm zel turin duhsakna a hlan a ni.

    Pu Donny-a chuan tunlai hian sorkar in thalaite run mektu ruihhlo do kawngah nasa takin hma a la a. Heng a hmalakna hi infiam mite pawhin hria a, ruihhlo laka kan fihlim mai piah lam ah, ruihhlo dona kawngah te, ruihhlo ti ve lo thalai leh kum naupang zawk te tan pawh Idol ni thei tura tan la a, ruihhlo laka fihlim zel turin a chah bawk a ni.

Dt 24.October, 2025 khan Mizoram State Sports Council Kum 50 tlin lawmna atan Mizoram Arm Wrestling Association leh Mizoram Body Building & Fitness Association ten Competition a buatsaih ah Lawngtlai District aiawh a kal te zingah Vanlalduata (75 Kg) Gold medalist leh T.Lalchhuanpuia (55 kg) Silver Medalist te Arm Wrestling ah hlawhtlinna an chang a. Tin, Mizoram Body Building & Fitness Association buatsaih Mister Mizoram 2025 ah hian ST.Lalremsanga (75 kg below) ah Silver Medalist a ni a. Heng mite hnen atang leh an hruaitute hnen atangin report pawh ngaihthlak a ni.

He hun ah hian District Sports Committee hruaitute’n District Bawrhsap hi an tawiawm bawk a ni.