Lawngtlai 12th Mizoram State Anti-Tobacco Day 2025 hman niin, Tobacco Free Youth Campaign 3.0 hawn a ni
Rauthla 31.October,2025 (Zirtawpni) : Vawiin khan CMO Conference Hall Lawngtlai ah District Tobacco Control Cell, Lawngtlai (DTCC) buatsaihin Mizoram State Anti-Tobacco Day vawi 12-na pualin Tobacco Free Youth Campaign 3.0 hawn a ni a, Senior Medical Officer Dr.Paul Lalchungnunga chuan a hawng.
Dr.Paul Lalchungnunga chuan, zuk leh hmuam hian mihring nunphung hi nasa takin a ti danglam a. Tunhma kan pi leh pu te hun ah Zuk leh hmuam lo ti thin tam tak an awm a. Hun a lokal zel a, tunah chuan kum upa lam te ai mahin thalaite zing ah Zuk leh hmuam ti kan tam ta tial tial mai a. Hei hi thil intihhmuh tha lo tak mai ani a, a changkang lo ani tih kan hriat thar a tha hle awm e, a ti a. Zuk leh hmuam lo ti thin kan awm anih pawhin sim tuma theihtawp kan chhuah a ngai a, a la ti ve lo te pawhin tih loh tum a, theihtawp chhuah a ngai ani, a ti bawk.
Dr.Paul Lalchungnunga chuan, zuk leh hmuam ti te nun hi a chep tulh tulh tawh a. A ti ve lo te tan hnawksak kan ni tawh a, punpuina hmun a meizial zu pawh kan tlem tial tial a, hei hi changkanna dik zawk chu a ni tih hria ila. Midangte tan hnawksak nih tum lova, kan lo nghei thei lo anih pawhin inthiarfihlim kan tum hram hram tur ani, a ti a. Dr.Paula chuan, Mizorama zuk leh hmuam lama danglamna siamtu ni ngei turin duhsakna a hlan a, Tobacco Free Youth Campaign 3.0 chu a hawng a ni. Kumin thupui atan hian 'Tobacoo Free Lifestyle' (Zuk leh hmuam tel lo nun dan changkang) tih hman ani
National Tobacco Control Programme LAWNGTLAI District hi April 2016 ah din tan ani a, District Tobacco Control Cell (DTCC) hi 1st April, 2016 ah din niin, Tobacco Cessation Clinic (TCC) hi 15th April, 2016 ah hawn tan ani a, tunah hian Staff pali (4) an awm mek a, District Nodal Officer hi Dr.Lalmuanawma Jongte, Chief Medical Officer ani.
Kum tin World No Tobacco Day hi 31st May ah khawvel huapin hman thin ani a, Mizoram hi State mal anga Anti Tobacco Day nei awmchhun an ni a. Mizoram State Anti-Tobacco Day hi Kum 2014 atangin Kum tin thupui hrang hrang neiin 11th September ah hman thin ani a. Kum in ah hian rolkhawlhna te a awm avangin a hun taka hman theih anih loh avangin 31st October , 2025 ah Mizoram District Capital hrang hrang ah hman niin hemi rual Tobacco Free Youth Campaign 3.0 hawnna neih nghal ani.
District Tobacco Control Cell (DTCC) te hian April, 2024 - September, 2025 chhung khan Zirna In hrang hrang hmun 22 ah awareness campaign an nei a, training vawi sarih (7) , ATS Drive (sec 4, 6 a&b) vawi 52 nei tawhin mi 11 hnen atangin dan bawhchhiat avanga an sum hmuh zat chu Rs 1,850 a ni. Hemi bakah hian Tobacco Cessation Clinic kalpui niin zuk leh hmuam nghei duh mi 462 an awm mek bawk ani
Vawiin a Mizoram State Anti Tobacco leh Tobacco free Youth Campaign 3.0 ah hi Dr. Isaac Lalnunpuia, Community Health Officer in a kaihruai a, H.Vanlalmuansangi, District Consultant, NTCP in introduction leh report a pe a, Vanlalngheta, Counsellor, NTCP in lawmthusawina hun a hmang a. He hun ah hian Anti Tobacco Squad member te, MJA, LWA Gen.Hqrs, MHIP Sub-Hqrs Lawngtlai, LSA hruaitute bakah sawm bik te an tel ani.
