LAWNGTLAI BAWRHSAPIN SANGAUAH FINANCIAL LITERACY CAMPAIGN HAWNGIN 'PRIMARY HEALTH CENTRE' A TLAWH NGHAL
Rauthla , 31st October 2025 : Vawiin khan BDO Conference Hall, Sangauah SBI Lead Bank Office, Lawngtlai bultumin 'Financial Literally Campaign ' hawnna inkhawm neih a ni a. Pu Donny Lalruatsanga, Deputy Commissioner, Lawngtlai chuan khuallian nia hmanpuiin Campaign-hawnna a nei a. Pu Thomas Maratha Hlychho, BDO chuan hun a kaihruai.
Pu Donny Lalruatsanga chuan kalkhawmte hnena lawmthu sawina a nei hmasa a. Mipui hnena sum hman leh enkawl dan inzirtirna (financial literacy campaign) chu thil pawimawh leh tangkai tak a nih angin, neih reng ngai a ni, a ti. Sum leh pai hman thiamloh avangin khawsak a buai thui thei a ni tiin, tha taka training turin a chah a. Vawiina training- neih chuan sum leh pai enkawl lamah thiama thar a thlen a beisei tih sawiin, duhsakna a hlan nghal bawk.
Pu PC Lalchunglura, Superintendent of Police Lawngtlai chuan 'Drug Awareness Campaign' puala thusawina a nei nghal a. Ruihhlo chi hrang hrang leh a hnathawh dan bakah a hlauhawm dan te, Ruihhlo do na kawnga Dan awm leh inhremna sawifiahna a nei a. Kawlkhawmte chu Ruihhlo laka fihlim tura chahin, a dona kawngah theihtawp chhuahpui turin a sawm nghal a ni.
Pu JM Soren Lead Bank Manager, Pu Han Raj, Manager, Mizoram Rural Bank, Sangau Branch leh Pu Lalzedinga, MRB te chuan Financial Literacy Campaign - ah hian kalkhawmte hnenah sum hman leh enkawl dan inzirna hun an hmang a. Zawhna leh chhanna hun hman nghal a ni.
Pu Donny Lalruatsanga chuan Primary Health Centre, Sangau, a tlawh nghal a. Dr. Mary Zothankimi leh a thawhpui ten an lo dawngsawng a. Bawrhsap chuan mamawh hrang hrang an neihte ziak thehlut tura chahin, a theih ang ang a lo bawhzui a tum thu a sawi a ni.
