LAWNGTLAI BAWRHSAP LEH SUPERINTENDENT OF POLICE TEN OPERATION JERICHO LEH MDC ELECTION INBUATSAIHNA KAL ZELAH SANGAUA LEH PANGKHUAA VC LEH NGO -TE THUTKHAWM NEIHPUI
Rauthla, 31st October 2025 (Zirtpawni) : Vawiin khan Pu Donny Lalruatsanga, Lawngtlai Bawrhsap leh Pu PC Lalchunglura, Superintendent of Police, Lawngtlai te chuan 'Operation Jericho' leh MDC inthlanpui lo awm tura inbuatsiahna kal zelah Sangau leh Pangkhuaa Khawtlang hruaitu - VC leh NGO- te thutkhawm an neih pui.
Pu Donny Lalruatsanga chuan khawtlang hruaituten an lo dawngsawnnaah lawmthu a sawi a. Ram leh hnam hmelma lian ber Ruihhlo do kawngah sawrkarin theihtawp chhuahin 'Operation Jericho' a kalpui mek tih tarlangin, mipuite tawiawmna pawh a tul hle a ni, a ti a. Ruihhlo do turin sawrkar chauh a tawk lo a, VC, NGO leh mipuite nen thawhhona tha tak a awm a tul hle tiin, tha hnem ngai taka thawhpuiah a sawm a. Khawtlang nuam leh chhenfakawm zawk siam turte, ram leh hnam chhuanawm ni turte, tu leh fate tana ram nuam zawk siam tur leh chhungkaw nuam zawk siam turin Ruihhlo tihrem a tul hle tih tarlangin, mimal leh Pawl ang pawha theihtawp lo chhuahpui zel turin a sawm a ni.
Bawrhsap chuan MDC Inthlanpui lo awm turah Official - lamte an inpeih thawkhat tawh hle tih tarlangin, inthlanna felfai leh thianghlim tak awm turin khawtlang hruaitute leh mipuite theihtawp chhuahpui turin a sawm a. India ram chu Mipui rorelna ram a nih angin, mipuiten an aiawha roreltu tur an thlang thin tiin an duh zawng tak mi tha leh fel, ram hmangaihtu thlangtling ngei turin duhsakna a hlan nghal bawk.
Pu PC Lalchunglura, chuan Ruihhlo do kawngah 'Operation Jericho' hnuaiah theihtawp chhuah mek a ni, a ti a. Ruihhlo do kawnga Police leh NGO- inpekna fakawm a tih thu a tarlangin, hma lam hunah pawh thawhhona tha zawk a awm zel a beisei thu a sawi a. Lawngtlai SP chuan inthlanna felfai leh thianghlim awm turin dan leh thupek kenkawh kawngah theihtawp chhuah a nih tur thu sawiin, mipuite an duhzawng tak thlang tling turin duhsakna a hlan nghal a ni.
VC leh NGO- te nen a inkawmhonaah hian Khawtlang hruaitute hian mamawh hrang hrang an neihte an lo thlen a. Pu Donny Lalruatsanga chuan an mamawhna a hriatthiampui tih tarlangin, vawi khatah engkim in pek vek theih loh ni mahse, a theih chin chin a intanpui a nih tur thu a tarlang a ni.
Deputy Commissioner (DC) leh Superintendent of Police (SP) te hi Pu Thomas Maratha Hlychho, BDO, Sangau, leh Pu Lalrindika, SDC, ten an tawiawm a ni.
