Pu Lalropuia Chinzah, Executive Member, LADC changtu hoin, CYLA hruaitute leh LADC Official ten Patanjall Foods Limited Company chungchang sawihona an nei
Rauthla, October24, 2025: Vawiin dar 10:30 a.m. khan Lawngtlai-ah LADC official-te leh Central Young Lai Association (CYLA) hruaitute chuan inrawnkhawmna an nei. He hun hi Pu Lalropuia Chinzah, Executive Member i/c Land Revenue & Settlement, in a kaihruai a, Patanjali Foods Limited Company-in Liapha ramchhunga Industrial Water Requirements chungchanga rawtna an siam chu an sawi ho.
Pu Lalropuia Chinzah, Executive Member, Land Revenue & Settlement Department, LADC changtu chuan, CYLA ten, Patanjall Foods Limited Company ten, Liapha ramchhunga, Industrial Water Requirements chungchanga hmalak an tum dante leh hemi chungchanga lehkha an theh luhte inhrilhfiahna leh sawiho a, inrawnkhawm atul thu a sawia, thil pawimawh tak a nih avangin ngun taka ngaihtuah chungin, kan ngaihdan leh duh dante zalen taka sawi theuh turin a sawm a ni.
Pu K.Lalthanzara, Executive Secretary, LADC in he thil lo pianchhuah dan leh Executive Committee, LADC ah ngaihtuah a nih tawh thute sawiin, Mizoram sorkar nen, January 22, 2025 khan Memorandum Of Understanding (MOU) an lo sign tawh bawhzuina kal zel a nih thute a sawi bawk. Oil Palm chingtu ten an tharchhuah an hralh theih nan helai hmun hi a sawngbawlna hmun atan hman an tum thu a sawi a, hetiang tho hian Mizoram hmundangah pawh hma an lak ve tho thute sawiin, Company dangte an lo rawih tawh thu leh an hlawhchham tawh avangin, tuna Patanjali Food Limited Company-te hi hmundanga an hnathawh tawh enin, an rawih tak thute a sawi bawk.
Pu F.Lalrothanga, CYLA President chuan, he thil hi chiang taka an hriat loh thu leh Social Media a Advertisement an hmuh hnuin, zirchian hmasak phawt tha an tih thu te, hmasawnna tha tak angin lang mahse, kan ram leh hnam tan ahim em, tih kan zirchian ve phawt a tulin kan hria a, chuvanga lehkha pawh rawn siam kan ni. Vawiin a kan hotuten sawihona hun leh thil awmdan inhrilhfiahna hun an buatsaih hi alawmawm kan ti hle a, mahse vawiin hian thutlukna siam mai tha kan ti lova, CEC ah ngun zawka la ngaihtuah a, an sawiho ve phawt atul thu a sawi bawk.
Pu A. Zaithanga, Sr. Revenue & Settlement Officer, LADC pawhin thusawiin, tuna ram an hman tumna ram-neitute nen an lo inbiak tawh thute, Pu PC. Vanlalruata, Minister GoM, Agriculture Department changtu nen a an inbiak dan chungchangte a sawia. LADC Revenue Department in Pass an pek danah, a pass neitu ten an hman theih dan leh hman phal chin a awm thute pawh sawifiahin, tunah pawh hian, an MoU a kum 30 an tih hi keini lam chuan, Official takin kan la hre lo a, he thil hi ngun takin ngaihtuah tlang ila, a thatna laite pawh kan thlir thiam ve pawh atha a, a that tawk lohna lai pawh a awm anga, chung chu kan sawiho a ngaih thu asawi bawk.
CYLA hruaitute dangte pawhin thu sawiin, Advertisement chhuah dan chungchangah thil fello a awm thute leh kan ram leh hnam himna tur hi kan duh ber chu a ni a, kut hnathawkte tana tha tur a nih chuan keini chuan tha kan tiin kan thlawp tlat zel dawn a, thil tha a nih chuan, kan hruaitute hi theih tawpin kan tawiawm zel dawn a ni. Mahse, kan ram hmasawnna hi athat viau laiin, kan hnam tan a him em tih kan ngaihtuah tel zel hi keini chuan tha kan ti a, vawiin kan sawihona hre reng chung hian, CEC ah sawiho leh phawt an duhthu an sawi bawk.
He inkawmhona hi Pu Lalropuia Chinzah, EM in a kaihruaia, Pu C. Lalmuanvela, DCAO leh Pu T. Zoramnghawra, DCHO, LADC te an tel bawk. He sawihonaah hian he Advertisement diklo hi siam tha tura hriattir nise an ti.
