Commissioner, State Election Commission Dr.H.Lalthangliana'n LADC MDC Inthlan hun tur pawh puan thuai ani ang, a ti

Rauthla 03.November,2025 (Thawhtanni): Vawiin khan Dr.H.Lalthangliana, Commissioner, State Election Commission (SEC) chuan, 12th Lai Autonomous District Council, Member of District Council (MDC) inthlanpui 2025 lo awm tur atana inbuatsaihna kal zelah NGO, Kohhran, MJA, Political Party- aiawhte kawmna DC Conference Hall ah a nei.

Dr. H. Lalthlangliana chuan, an lo kal chhan leh thutkhawm neih a nih chhan ber chu LADC hnuaia MDC inthlanpui lo awm tura inbuatsaihna kalpui chin lo enfiah an nih thu a tarlang a. Mipuiten an duh zawng zalen tak a an thlan chu thil pawimawh hmasa a nih thu sawiin, theihtawp chhuah a nih thu a tarlang a. Commissioner - chuan inthlan ni puan thuai a nih dawn thu tarlangin, party - te chu mipuite zalenna tibuai khawpa che lo tur leh thu dik leh dawt tello a inzuar turin a chah a. 

  Dr.H.Lalthangliana chuan, LADC hnuaia MDC inthlan lo awm turah hian State Election Commission pawh inthlan felfai leh thianghlim tak a awm theihna turin theihtawp chhuahin kan inbuatsaih a. Inthlanna atana zawm tur thuchhuah hrang hrang te pawh a awm dawn a. Chungte chu a bik takin Political party te pawhin zawm a pawimawh hle dawn a ni, a ti a.  Tin, NGO leh Kohhran hruaituten chu inthlanna thianghlim leh zalen a awm theih nan a theih tawp chhuahpui tur leh venpui turin a ngen nghal bawk a ni.

Commissioner chuan, inthlan chung-changa thuthar thehdarh kawngah, thudik leh rintlak chauh Social media leh Media dangah pawh thehdarh fo a tul thu a sawi a. Thuthar thehdarhtute pawh thu belhchiandawl leh thudik chauh thehdarh a, mipuite pawh theihtawp chhuaha zirtirna pe turin a sawm a. Inthlan lo awm tura kan inbuatsaihna kawng hrang hrangah Political party te pawhin thudik leh rintlak chauh mipuite hriattir a, harsatna a lo awm anih pawhin thuneitute hnena thlen vat zel thin turin a sawm bawk a ni.

Pu VL. Remliana Secretary, SEC chuan thu tawi sawina a nei a. LADC inthlanpui lo awm turah khauh taka dan kenkawh a nih tur thu tarlangin, 'Model Code of Conduct' tha taka zawm turin Party- te a chah a. A bik takin inthlanna felfai tak a awm theih nan NGO leh Kohhrante thahnem ngai taka SEC thawhpui turin a sawm a ni.

Thutkhawmah hian NGO,Kohhran, thuthar thehdarhtute leh Party aiawh an telkim tha hle a. Inthlanna felfai leh thianghlim taka awm turte, inthlannaa hriat tur pawimawh tak tak leh hma lak ho dan turte sawiho a ni a. Zawhna leh chhanna hun tha tak neih nghal a ni bawk.

He thutkhawmah hian NGO, Kohhran, thuthar thehdarhtute, Political Party- aiawh leh LSA hruaitute an tel thei a. Pu Donny Lalruatsanga chuan kalkhawmte hnena lawmthu sawina neiin hun a khar.

Commissioner, State Election Commission  Dr.H.Lalthangliana hi  Pu V.L. Remliana, Secretary (SEC) leh Pu Vanlalchhuanawma Chhawngthu, Deputy Secretary (SEC), ten Commissioner- hi an tawiawm a ni.