Rauthla 04.11.2025 (Thawhlehni) : Mizoram Cleanliness Competition 2025- inbuatsaihna kal zelah vawiin khan Lawngtlai bawrhsap Pu Donny Lalruatsanga kaihruaiin a Office Chamber-ah ' Mizoram faina inelna neih tur atan thutkhawm neih a ni.
Pu Donny Lalruatsanga chuan, Faina leh thianghlimna kawngah Lawngtlai khawpuiin rahbi thar a kaina turin theihtawp chhuah mek a nih thu tarlangin, VC leh NGO- te pawh theihtawp lo chhuah zel turin a sawm a. A bik takin bawlhhlawh thliar hran kawngah tawih thei leh theilo te chu uluk taka thliar hran a tul hle a, hemi kawngah hian tan lak thar a tul hle a ti.
District Bawrhsap chuan Sanitation Department, LADC hmalakna fakawm a tih thu tarlangin, hma lam hunah pawh theih tawp chhuah zel turin a ngen a. Bawrhsap chuan Mizoram khawpui fai ber ni tura theihtawp chhuah turin Lawngtlai mipuite a sawm nghal bawk.
Thutkhawmah hian thil pawimawh tak tak sawihona neih a ni a. Bawlhlawh thliar hran, a bik takin tawih thei leh tawih thei lo thliarhran chu pawimawh leh tul an tih thu an pawm tlang a. Hemi atan hian New Vengpui chu Vengdang te entawn tur (Model Locality) atan thlan a ni a. VC, YLA, UD&PA, leh Sanitation Department LADC- te nen tangtlangin hmalakna neih a ni ang a. Bawlhhlawh thliar hran kawnga an hmalak leh hnathawh dan chu Lawngtlai khawpui chhunga veng dangte pawhin an zawklm ve leh dawn a ni. A bik takin tawih thei leh tawih theilo thliar hran chu uar zawkin mipuite zingah inzirtirna kalpui ni se, veng tinten in elna thianghlim lo nei se an ti a. Faina leh thianghlimna kawngah hmasawnna rahbi thar awm turin theihtawp chhuah ni se an ti a ni.
Vawiin thutkhawmah hian Sanitation & Waste Management Officer, LADC, Local Administrative Officer, LADC, New Vengpui VC leh YLA - aiawhte an tel thei a, Pu Donny Lalruatsanga chuan lawmthu sawina neiin hun a khar.
