MGNREGA thlakna tur VB-G RAM G bill chu sut turin eptu lam ten phut in kawng an zawh
Rauthla 19.12.2025 (Zirtawpni) : Central-a BJP kaihhruai National Democratic Alliance (NDA) sorkarin Congress kaihhruai United Progressive Alliance (UPA) sorkar laia flagship programme siam, MGNREGA (Mahatma Gandhi National Rural Employment Guarantee Act) hming thlakna tura bill a siam chu sut turin eptu MP-ten an phut. An thil phut lantirin eptu MP-te hian Parliament Complex ah kawng an zawk.
BJP sorkar chuan MGNREGA thlakna tur hian Viksit Bharat Guarantee for Rozgar and Ajeevika Mission (Gramin) (VB-G RAM G) Bill a siam a, union cabinet pawhin a lo pawm tawh a ni. Bill hi Parliament session neih mekah put luh ni tawhin, sawi ho mek a ni. Eptu party, a bikin Congress chuan bill hi an dodal nasa hle a, sorkar laipui thiltih dan chu India hnam pa, Mahatma Gandhi hmuhsitnaleh, MGNREGA, 2005 tihdanglam tumna a ni, an ti.
Bill-ah thingtlang lam mite tana ni 100 inhlawhna siam thin chu ni 125 ah tihpun tumani. Parliament-ah bill hi pawm a nih a, Act ah chantir a nihhnuah state sorkarte chuan dan tharin kaihruaina a siam nena inzul turin scheme an siam a ngai dawn a ni. Hna thawh theih ni hi tihpun ni mah se, hna thawh tur ruahmanna slamte chu pawmpui phawt zel a ngai dawn a ni.
Nimina lungawi lohna lantirnaah hian Congress party president Mallikarjun Kharge bakah hruaitu hlun, Sonia Gandhi pawh a tel. Dravida Munnetra Kazhagam's (DMK), Indian Union Muslim League's(IUML), Shiv Sena (UBT) leh Revolutionary Socialist Party's (RSP) hruaitute pawh an tel. 'Mahatma Gandhi NREGA' tih inziahna banner lian tak kengin, Gandhi lim awmna, Prena Sthal ațangin Makar Dwar thleng kawng an zawh a, sorkar thiltih dana an lungawi lohna thute an aupui bawk. Parliament-a bill a put luh chu sut turin an phut.
Congress party hruaitu hlun leh union minister hlui, P Chidambaram chuan NDTV-in a kawmnaah, MNREGA hming thlak chu India hnam pa, Mahatma Gandhi thah nawn lehna a ni, a ti. BJP chuan India mipuite rilru ațangin Gandhi nuaireh an tum a ni tiin a sawi.
