All Mizoram Village Council Association (AMVCA) hruaituten CM hmu
Rauthla 06.02.2026 (Zirtawpni) Vawiin 6.2.2026 khan All Mizoram VC Association hruaitute chuan Pu Lalduhoma, Chief Minister chu hmu in Village Council ten Fifteen Finance Commission Grand (FFC) tha taka an thawh theih nana chak taka hma alakpui avangin lawmthu an hrilh a, chubakah an mamawh hrang hrangte an thlen a ni.
AMVCA hruaitute chuan Chief Minister hnenah VC ten khawtlang hmasawnna hnathawhna tur FFC tha taka an thawh theih nana Chief Minister leh Finance Minister a nihna anga chak taka a bawhzui sak avangin Mizoram VC zawng zawngten khawtlang hmasawnna tur pawisa tam tak an hmuh phah chu lawmawm an tih thu an hrilh a, Chief Minister Pu Lalduhoma kaihhruai sawrkar in VC te a ngaisak avangin lawmthu an sawi a ni. Tin, Chief Minister chuan AMVCA hruaitute hnenah, FFC atana theih tawp an chhuah thu leh a hlawhtlin theih nana rim taka thawktu zawng zawngte pawh an fakawm a tih thu a sawi bawk.
AMVCA hruaitute chuan Chief Minister hnenah hian VC lawmman tihsan chungchanga ngenna an lo thlen tawh chungchangte, Aizawla Village Council khualbuk neih chungchangte, All Mizoram VC Conference neih chungchangte an thlen bawk a ni.
AMVCA hruaitute chuan Prof. Lalnilawma, RD&AD Minister hmu bawk in Village Council mamawh hrang hrangte a hnenah an thlen bawk a. VC ten khawtlang hmasawnna atana hna an thawhna turah theih tawp a chhuahpui thin avangin lawmthu an hrilh a, VC te lawmman tihpun a nih theih nana theih tawp a chhuahpui avangin lawmthu an hrilh bawk a ni.
Tin, AMVCA hruaitute chuan LAD Director thar Dr. Lalngura Tlau chu hmu in thawhhona tha leh chak zawk an neih zel theih nan duhsakna an hlan bawk a ni. AMVCA hruaitute hi Pu FP Laikhama, President in a ho a ni.
