CADC leh LADC inrina a CYLA in lung an phun chungchang Larsap hnenah thlen
Rauthla 24.02.2026 (Thawhlehni) : Bharatiya Janata Party (BJP), Chakma Autonomous District Council (CADC) aiawh mi pahnih—Shri Durjya Dhan Chakma, District President, leh Shri Doyal Chandra Dewan, Vice President te chuan, Central Young Lai Association (CYLA)-inLADC leh CADC inrina lung an phunna chu a dik lo tiin BJP, Chakma Autonomous District Council(CADC) hruaitute chuan Larsap hnenah an lungawi lohna an thlen
Feb 13,2026 khanCentral YLA te Chakma Autonomous District Council hnuaia Parva khuaah kalin, kha lai hmun kha Lai Autonomous District Council ram a ni tih lantirna boundary pillar an va phun a. He mahni thu thua thil an ti hi CADC mipuite zingah lungawilohna nasa tak a thlen a, an dem hle a ni, an ti a.
Shri Durjya Dhan Chakma chuan hetiang thiltih hi thil tul lo leh incho chhuahna a nih bakah, Chakma leh Lai hnamte inkar rina tawp tawh, inrem taka awmho-na tichhe thei a ni tih a sawi a. Ramri chungchang reng reng chu thuneitu-te kaltlang chauha chingfel tur a nih thu leh, pawl pakhat mahni thu thua chet lakna hmanga fel tur a nih loh thu a sawi bawk.
\ Kum 1972–1977 chho khan, Pawi-Lakher Autonomous Region thenhran a nih hnuah CADC leh LADC hian ramri hi an lo enfiah tawh a. Chutih hun lai chuan CADC Chief Executive Member, Shri Nilmoni Chakma chuan he ramri hi a lo tifel tawh a, chutih lai chuan buaina engmah a awm lo a ni, an ti a. Ramri hi Pawi-Lakher Autonomous Region (Re-organization) Order, 1972-ah khan chiang taka tarlan a ni a, Sanghatuilo Lui (Chakma tawnga Rangapanisora) leh Survey Height Point 405-te hmangin siam a ni, an ti bawk.
Shri Durjya Dhan Chakma chuan Mizoram Governor hnenah he thil hi enfiah tur leh, dan lova pillar an phun chu la sawn vat turin a ngen a, buaina lian zawk a chhuah loh nan hma la turin a ngen bawk. Thuneitu ten he thil hi an enfiah chhungin mipui zawng zawngte inlungrual leh muanngan taka awm turin a chah a ni. Governor chuan an thlenna hi ngun takin a lo ngaihthlak sak a, a hma thei ang bera hma a lak tur thu a lo tiam a ni.
BJP, CADC chuan Constitution-in dikna a pek te, CADC ram chin humhalh te, leh Mizorama hnam hrang hrangte inkara inremna vawnhnun chu an thupui ber a nih thu an sawi bawk a ni.
