Dan leh dun hriat chu khua leh tui tha nihna a ni a bik takin sawrkar hnathawkte tan a tul zual
- Pu Donny Lalruatsanga, DC Lawngtlai
Rauthla 11.02.2026 (Nilaini) : Nimin khan Administrative Training Institute (ATI) leh Mizoram State Legal Services Authority tangkawp buatsaihin Lawngtlaia Sawrkar hnathawkte tan ' Special Awareness Campaign on Legal Provisions' DC Conference Hall- ah neih a ni a. Lawngtlai Bawrhsap Pu Donny Lalruatsanga chuan khuallian nia hmanpuiin, Pi Jothansangi Tlau, Chief Judicial Magistrate (CJM) chu khualzahawm a ni.
Pu Donny Lalruatsanga chuan kalkhawmte hnena lawmthu sawina a nei hmasa a. Dan leh dun hriat chu khua leh tui tha nihna a ni a, a bik takin sawrkar hnathawkte tan a tul zual em em a ni, a ti. Dan hriatloh hi thil pawi tak a ni a, hriatloh hi thiam channa a nih loh avangin a tam thei ang bera dan hriat chu sawrkar hnathawkte tan a pawimawh hle tih a sawi . Dan hriat ang angte pudarhtu leh midangte zirtirtu ni theuh turin kalkhawmte a chah a. Bawrhsap chuan dan tel lovin sawrkar a kal thei lo tih tarlangin tha taka dan leh thupek kengkawh tura tha taka training turin sawrkar hnathawkte a chah a ni. Dan tam tak awm mahse, vawiin training naa thupui thlan chhuah chu a pawimawh zual tih tarlangin, hlawk taka hun hmang turin kalkhawmte duhsakna a hlan nghal a ni.
Khualzahawm Pi Jothansangi, CJM, chuan dan zir chu thil pawimawh leh tul tak a nih bakah dan thar a lo chhuah reng avangin mahni inennawn fo a tul hle a ti a. India ramah dan a lal ber tih tarlangin, dan hriat chu mi tin tihmakmawh a nih thu a sawi. A bik takin dan hriatloh avanga harsatna tawh theih a nih thu sawiin, dan pawimawh bik te hriat ngei ngei a tul hle a ni, a ti. Sawrkar hnathawkte chu an hnathawh kawngah dan pawimawhna hre thar tura chahin, tha taka training - nei turin a ngen nghal bawk.
Pu F. Lalremmawia, Deputy Director, ATI chuan 'Special Awareness Campaign on Legal Provisions' chu District hrang hranga kalpui tur a nih thu sawiin, training - tha taka nei turin kalkhawmte a sawm a ni.
He hun hmannaah hian thupui thlan bik hmangin zirhona neih a ni a. Pi Jothansangi, CJM chuan 'Alternate Dispute Redressal/Legal Services ' leh 'Social Media Ethics' tih thupui hmangin zirtirna a pe a, Pu C. Lalbiakkima, Govt. Advocate chuan ' Writ Petitions, Appeals, Contempt Cases and Parawise Comments' tih hmangin zirtirna a pe a. Pu C. Lalremsanga, Civil Judge cum JMFC chuan ' Child Laws: POCSO Act & JJ Acts' leh ' General Principles / Legal Maxims, Doctrines in law ' tih thupui hmangin zirtirna a pe bawk a ni.
Pi Margaret J. Vanlalremmawii SDO (S) chuan kaihruaiin Lawngtlaia Sawrkar hnathawkte an tel kim tha hle a, zawhna leh chhanna hun tha tak hman a ni.
