MNF-in tihdan phung dik tak hmangin hma kan la :J. Malsawmzuala
Rauthla 06, 02. 2026 (Zirtawpni) : MNF Gen. Secretary J. Malsawmzuala'n IAF hnena ram hralh chungchang CBI-in an chhui theihna turin MNF-in tihdan phung dik tak hmangin hma an la niin a sawi.
MNF party chhung inkhawm vawiina neihah he thu hi J. Malsawmzuala chuan a sawi a. IAF hnena ram hralh chungchang CBI-in dan ang taka a chhui theihna turin dan ang takin sawrkarin an complaint a dawng tawh nia sawiin, "engtin nge hma a lak zui zel tih kan enzui dawn a ni" a ti.
ZPM chu CBI leh IAF hnena Lengpui ram hralh chungchanga sorkar hmasate puhchhiat leh beihna hman tum ngar ngarah puhin, "duh leh an cho ang ngeiin MNF chuan tihdan phung dik tak hmangin hma a la ta a ni" a ti.
J. Malsawmzuala chuan CBI-a thubuai chhuitir theitu chu Allocation of Business Rules-ah Vigilance department a nih thu sawiin, "Vigilance department changtu chu Chief Minister a ni" a ti a. "Sawrkar lai berin tihdan phung dik hmang lova, pehhel tuma, party-in a rel tur ni awm tak Council of Ministers thurel anga FIR thehluh an tum hi a mak hle a ni" a ti bawk.
PWD (highway) hnuaiah kum 2018-2023 November thlengin restricted tender pek a awm lo nia sawiin, J. Malsawmzuala chuan "ZPM kum hnih sawrkar-ah Rs. 1,55,39,49,734 hu restricted tender pek a ni tawh" a ti a. PWD (building) hnuaiah MNF kum 5 a sawrkar chhungin restricted tender 95, Rs. nuai 53312.46 hu pek a nih laiin, ZPM sawrkar kum 2 ah 96, Rs. nuai 55196.56 hu pek niin a sawi.
Heng bakah hian department dangah pawh tam tak sawi tur a awm nia sawiin, "tunhmaa kan la hriat ngai loh, restricted tender pek huk phalna, 'blanket approval,' hial pek a ni" a ti bawk bawk.
J Malsawmzuala chuan "ZPM sawrkar hnuaiah a hun taka sawrkar hnathawk te hlawh pek an nih thu sawi fo mahse, thubelhchiandawllo a ni" a ti a. "Kum 2023, December atanga 2026, January - kum hnih chhungin, 2024, April leh 2024, May thla ah chiah hun pangngaiah sawrkar hnathawk te hlawh pek an ni", a ti bawk a ni.
