Mizoram Electricity Regulatory commission chuan eng chhit kan chungchang ah Public hearing a nei
Rauthla 20.03.2026 (Zirtawpni) Vawiin khan Power & Electricity Department-in kum 2026-27 atana eng chhit man (Electricity tariff) a rawtna chungchangah Mizoram Electricity Regulatory Commission (MZERC) chuan Public Hearing a nei.
Public Hearing hi MZERC Chairperson, Pu Benjamin L.Tlumtea kaihhruaina-in Aijal Club-ah neih a ni a. Hun bituk chhunga mipuite'n rawtna leh sawiselna thu an thlente leh P&E department-in an chhannate ngaihthlak a ni.
Kum kal mek 2025-2026 leh kum hmasa 2024-25 -ahte khan eng chhit man hi tihsan a lo ni tawh lova, tuna P&E department-in rawtna a thehluhah pawh hian eng chhit man tihsan rawtna a awm lova, mipui atanga Revenue sum mamawh zat (ARR) a hmuh tlin lohna chu Sawrkarin subsidy-in a peksak dawn a ni. MZERC chuan ngun taka a zir chian hnu-ah kum thar FY 2026-27 atana Sawrkar pek tur subsidy leh eng chhit man tur zat hi a bithliah dawn a ni.
Multi-Year Tariff Regulations, 2014-in a phut angin P&E department hian kum tinin mipui hnena power supply enkawl nana sum leh pai a mamawh (Aggregate Revenue Requirement) leh, eng chhit man bithliah chungchanga rawtna a neihte chu Commission hnenah a theh lut thin a. A rawtna hi newspaper-ah chhuahin mipui vantlang (consumers leh stakeholders) tan sawiselna hun emaw, thurawn pekna hun emaw hawn thin a ni a. Sawiselna emaw, thurawn emaw pe duhte chuan MZERC hnenah ziakin (Affidavit hmangin) an thehlut thin a ni.
