'Zirlaite zingah inelna thianghlim zawk a awm theih nan Result Bu-ah Top 10 leh Division tarlang ngei turin kan duh'
— MZP President
Rauthla 28.04.2026 (Thawhlehni) : MZP President, Dr. C. Lalremruata chuan, Mizoram sorkarin kumin aṭangin result bu-ah Ranking leh Division te tarlan tawhloh nise a tih chu MZP chuan Mizo zirlaite zingah inelna thianghlim a awm theih nan tarlan ngei nise an duh tih a sawi.
Dr. Remruata chuan, "Mi ṭhenkhatin MZP ten kum tina an lo tih ṭhin top 10 chawimawi theihloh dawn avanga duhlo anga min ngaihna hi thudiklo a ni,” a ti a. “MZP chuan zirna kawnga hma kan sawn theih nan Question pattern leh Exam system bakah kan syllabus te siamṭha in, midangte el pha ve tura hmalakna hi zirna kawnga hma kan sawnna atan chuan hmalakna hmasa turah kan ngai a. Nakkum lam aṭang chuan sorkar thuneitute pawh Mizo zirlaite zingah inelna thianghlim zawk a awm theih nan kum lo la kal leh zel turah pawh Result Bu-a Top 10 leh Division tarlang ngei turin kan ngen nawn leh a ni," a ti a. Kumin result-a sorkar sikul fail an awmlo chu hmasawnna ropui tak niin a sawi bawk.
Zirtirtu indaihlo te, mahni post-a awm ṭha duhlo te, attach tam lutuk hate chu MZP chuan a ngaimawh hle tih sawiin, "Zirna kan ngaih pawimawh ber tur a nih laiin leh Mizoram khawtinah sikul te kan neih vek avangin zirna kaihhnawih bik khawitu tur 'Mizoram Education Service' neih vat hi MZP chuan ngaiin a hria a, kan Education Minister ngei pawhin a pawimawhzia a hria a, Mizo zirlaite hmakhaw ngaia tihnhlawhtlin vat a nih theih nan thuneitute kan ngen nawn tak meuh a ni," a ti.
MZP President chuan, tunhnaiah thil pawi tak leh zahthlak tak, 'zirtirtu leh naupang inngaizawng emaw, zirtirtuin naupang a ngaihzawn chanchin sawi tur a awm a, harsatna neia MZP Pisa Puia tlan lut hial an awm,' a ti a. "Zirtirtu an nihna hmang ṭangkaia naupang laka advantage lo la an awm hi MZP chuan a dem tak zet a. Kan zirlai bakah nundan thlenga min zirtirtu tura kan ngaih te’ln an naupangte chunga hetiang rilru an pu hi a mak a, an demawm takzet a ni," a ti. "Hemi chungchangah hian kan zirtirtu zahawm tak tak te fimkhur lehzual turin a ngen a ni," tiin, sorkar thuneitute pawh a ṭul anga hma la turin a ngen tih a sawi bawk.
