Kum dang ang bawkin June 11 hian Lawngtlai ah Green Mizoram Day hman a ni dawn

 

Green Mizoram Day June 11, 2026 hian Lawngtlai ah hman a ni dawn

Rauthla 27.05.2026 (Nilaini) : Vawiin khan Pu Donny Lalruatsanga, District Bawrhsap leh 'Lawngtlai District Level Committee on Green Mizoram' Chairman nibawk kaihhruaina hnuaiah June 11,2026 a Green Mizoram Day Lawngtlai a hman dan tur ngaihtuah in an thukhawm

Pu Donny Lalruatsanga chuan, Green Mizoram Day kan hmang leh dawn a ni a. He ni pawimawh tak mai hi tute pawhin kan ngaihpawimawh a, khawvel sik leh sa inthlak danglam zelah thing leh mau te kan humhalh a, kan phun belh zel hi kan tih tur pawimawh tak a ni a. Tin, thing kan phun thin a, a enkawl kawngah pawh hian tan kan lak a, ngaihtuahna thar kan sen a tul tak zet a ni, a ti. 

Pu Donny-a chuan, Lawngtlai District chu kawng hrang hrang in hma kan sawn mek a. Chumi rual chuan ramngaw enkawl kawngah erawh tan kan lak thar a, neitu rilru pu a theihtawp kan chhuah a, thing leh mau, ramngaw leh nungchate humhalh kawngah bul i tan thar leh ang u, tiin kalkhawm te a sawm nghal bawk a ni.

        Kumin Green Mizoram Day hi June 11, 2026 ah Mizoram pumpui ah ‘Thing hi rangkachak anga hlu, Nunna tinreng bul a ni’ (Tress are Green Gold, The roots of all life) tih thupui hman a ni dawn a. Kumin Green Mizoram Day Lawngtlai a hmanna turah hian Pu C.Lalsawmzuala, CEM LADC chu khuallian tura beisei a ni a. Lawngtlai Bawrhsap Pu Donny Lalruatsanga chu Chairman a ni ang. Hemi ni vek hian Bawrhsap kawtzawla hun hman zawhah thing tiak phun leh ni se tih a ni a, Department leh NGO - te thingphun tur bituk sak nghal niin, thingtiak- 420 phun ni se an ti a ni. Thingtiak- hi Kawlchaw bul, NH- 02 kawngpui dungah phun a ni ang. Thing phun enkawl chungchangah a phuntu department - te kutah dah niin, kum khatah vawi hnih- September leh February- ah a hmunhma samfai thin ni se an ti a ni.

Kumin Green Mizoram Day hman hunah hian Kum 2025 a Kangmei Veng tha khua te hnenah lawmman hlan an ni ang.