Chief Minister hovin 132 Mega Watt Tuivai Power Project tur sawiho
Rauthla 27.05.2026 (Nilaini) : Vawiin khan Chief Minister Pu Lalduhoma hovin a office-ah 132 MW Tuivai Hydroelectric Power Project chungchang Power Minister Pu F. Rodingliana leh P&E thawktuten an sawiho.
Tuivai hi DPR siam zawh tawh a ni a, tender tihchhuah theih a ni tawh a, PPP Mode-a kalpui tura tinzawn a ni.
Tun dinhmuna Mizoram power mamawh hi a san lai berin 182 MW a ni a, 20th Electric Power Survey chhut danin kum 2030 ah khian Mizoram power mamawh zat tur hi a san lai berin 213MW vel ni tura chhut a ni. Tunah hian state sorkar hian power siam theihna (installed capacity) hi 50.20 MW kan nei mek a, a tak taka an siamchhuah zat phei chu a tlem lehzual a. A mamawh zawng zawng zaa sawm (10%) vel chauh tharchhuak ang a ni a. Kum khata power lei nana Mizoram sum sen ral hi transmission charge tel lovin Rs. 64,954.45 lakh vel a ni. Hei vang hian Mizoramin power siamchhuahna tam zawk a neih hi thil tul tak nia ngaih a ni.
Tuivai hi kum 1992 ah Central Water Commission chuan 210MW pe chhuak thei turin a lo survey tawh a. Nimahsela, tui hian Manipur state chhung a chim tel dawn avangin Survey hi a thara kalpui leh a ni a. Megawatt 132 pe chhuak thei tura duan that niin Detailed Project Report hi peih a lo ni ta a ni.
Hna kalpui tur a kumtina sum leh pai sen ngai zat turte Finance Department nena enho tura tih a ni.
Vawiin meeting-ah hian Tuivai Project bakah Tuirini Project kalpui mek te leh RDSS hnuaia hnathawh mek te an sawi a. Union Power Minister-in Mizoram a rawn tlawh huna Mizoram mamawh lo sawipui tur chite pawh an sawiho a ni.
