Minister hlui leh MLA hlui anticipatory bail pek an ni
Rauthla 16.May,2026 (Inrinni) : Special Court (Prevention of Corruption Act) chuan tunhnai khan skywalk leh ropeway siam thubuai kaihhnawihah Tourism minister hlui John Rotluangliana leh MLA hlui Lalrindika Ralte te anticipatory bail a pe.
John Rotluangliana leh Lalrindika Ralte ten anticipatory bail an dilna hi May 11, 2026 khan Special Court chuan a ngaihtuah a, an tih tur leh an tih loh turte a bituk hnuah a phalsak. Bail bond atan court chuan cheng nuai 2 ve ve a bituk sak.
Anticipatory bail ngaihtuahnaah John Rotluangliana ukil chuan John Rotluangliana chu Dawrpui Veng, Aizawla cheng nghet a nih avangin tlanbo mai tur a nih loh thu sawiin, "A hmain criminal case la nei ngai lo a ni a, MLA țum eng emaw zat lo ni tawh a ni. Man a nih chuan a hming hliau phahin, a political career thleng pawhin nghawng a nei thei dawn," a ti.
John Rotluangliana chu cancer natna nei a nih thu sawiin a ukil chuan, "In zai, radiation therapy leh hyperbaric oxygen therapy tum tam tak lo hmachhawn tawh a ni," a ti a, hun bituk nei a hriselna dinhmun endik leh enkawl ngai a nih thu a sawi.
Lalrindika Ralte ukil chuan Lalrindika Ralte chu MLA hlui, Zarkawt, Aizawla cheng nghet a nih avangin tlanbo tur chi a nih loh thu sawiin, "Thubuai chhuina zawhfel tawh a ni a, chargesheet pawh thehluh vek a ni tawh. Chuvangin, finfiahna tihchhiat theih a ni tawh lo hrim hrim. Tin, thubuai nei dang Biakthanmawia Pautu leh Satish Aparajit-te pawh anticipatory bail pek an lo ni tawh," a ti.
Special Court chuan John Rotluangliana leh Lalrindika Ralte te ukil thusawi bakah, Lokayukta ukil thusawite a ngaihthlak hnuin, an pahnih hian anticipatory bail a phalsak ta a ni.
Ropeway leh skywalk siam thubuaiah hian a chhuitu ACB chuan an chhuina report chargesheet chu court-ah an thehlut tawh a, thil tisuala puh zingah Tourism minister hlui pahnih - John Rotluangliana, Robert Romawia bakahMLA hlui Lalrindika Ralte te an tel a ni
