Green LADC Day 2026 hman ani leh dawn
Rauthla 03.06.2026 (Nilaini) : Vawiin khan Lai Autonomous District Council a Environment, Forest & Climate Change Department enkawltu Executive Member Pu HC Lalengkima chuan Green LADC Day June 5,2026 ah hman ani dawn a. Kumin kum kal mek ah chuan kum dang zawng aiin thingphun kan uar ang a, a enkawlna kawngah pawh tan kan la thar dawn a ni, a ti.
Pu HC.Lalengkima hian Mizoram Journalist Association, Lawngtlai te chu leng ah sawmin, Kum 2015 atangin LADC chuan Green LADC Day kan lo hmang tan tawh a. Kan hruaitu hmasa te hmalakna leh inpekna avangin kawng kamah thingkung mawi tak tak hmuh tur a awm hi a lawmawm hle a. Kan hruaitu hmasa te thil tha tih hi theihtawp chhuah in kan chhunzawm zel dawn a. Kumin ah phei chuan kum dang zawng aiin tan kan la dawn a, thing kan phun te a nung tha em, tih kan en chhunzawm dawn a. A tam thei ang ber enkawl nun anih theihna turin hma kan la dawn ani, a ti.
Pu HC.Laleng-kima chuan tunkar zirtawpni hian “Thing phunin boruak thianghlim i siam ang u’ tih thupui hmangin Green LADC Day kan hmang dawn a. Lawngtlai leh Kawlchaw inkar NH 02 ah thingtiak 420 phun tum a ni a, heng kan thing phun te hi enkawl zui zel a ni dawn a. Chumi rual chuan heng kan thingphun te hi a enkawlna kawngah mitin hian mawhphurhna ah kan neih a, kan tanho a ngai ani, a ti. Chutiang tur chuan MJA te nen pawh thawhhona tha tak nei a, mipui zirtirna kawngah tan min lakpui turin ka ngen che u a ni, tiin MJA member te pawh thawhho pui ah a sawm a ni.
Lawngtlai District MJA te chuan thingphun tam tak te hi Forest Department te enkawl anih mek laiin, a phuntu Department te pawh hian tun aia tha leh zuala enkawl theih dan kawng ngaihtuah se an duh thu an thlen a. Tin, Thingtiak an phung thenkhat ah te hian mipui / zin mite’n an chhawr thei tur thei lam te pawh phun uar deuh nise, an duh thu an thlen bawk a ni.
Executive Member tawiawmtu DCCF, Pu K.Lalromawia chuan Thingtiak 3376 phun a ni tawh tih sawiin, Forest Department ten an enkawlzui reng vangin zaa 90 chuang a nungtha a ti a, Green LADC Day ah Forest Range paruk leh Beat Post ah te pawh Thing tiak an phun vek dawn niin a sawi.
