Mizoram ah scrub typhus vei an tam

Mizoram ah scrub typhus vei an tam

Rauthla 04.06.2025 (Nilaini) :  Tunlai hian Mizoram hmun hrang hrangah rannung seh natna, scrub typhus vei an tam nia hriat ani a, IDSP in an chhinchhiah chin ah, kumin hian rannung seh natna vei mi sang 5 chuang hmuhchhuah an awm tawh. 

Aizawl khawpui chhunga damdawiin thenkhat a thawk te sawi danin, tunlai hian Casualty pan leh OPD-a inentir zingah, rannung seh natna vei hmuh chhuah an awm nual a. IDSP state nodal officer Dr. Vanlalrengpuia Chinzah chuan rannung seh natna hian kumtluanin Mizoram a chenchilh a, chutih rual chuan vei an tam zual hun lai chu, June atanga December thla inkar anih thu sawiin, IDSP in, an chhinchhiah chin ah kumin hian he natna vei hmuh chhuah hi mi sang 5 leh 945 an awm tawh tih a sawi.

IDSP in an zirchianna atanga alan dan in, vector borne leh water borne disease atanga natna kai theih zingah, rannung seh natna chu Mizoram mipuiin an vei tam ber natna a ni mek a. 2024 chhung khan he natna vei hi mi 15,969 an ni a. IDSP state nodal officer Dr. Vanlalrengpuia Chinzah chuan scrub typhus vei hi an pun chhoh zel avangin he natna kai lo tur hian, thianghlimna kawngah tan lak a tul thu a sawi a, he natna pudarhtu, tuhrik leh rannung dang, sazu te, In leh a chhehvel ah, an awmlohna tura, inchhung tihfai uluk a tul thu te, ram hnathawk thinte pawhin an hnathawh kawr te chu an suk fai that atul thute a sawi.