LAWNGTLAI BAWRHSAP LEH SUPERINTENDENT OF POLICE TEN ELECTION LO AWM TURAH TUICHHAK TLANGDUNG FANG
Lawngtlai, 30th October 2025 : Lai Autonomous District Council (LADC) - a Member of District Council (MDC) inthlanpui 2025 lo awm tur atana inbuatsaihna kal zelah vawiin khan Pu Donny Lalruatsanga, District Election Officer (DEO) leh Lawngtlai Bawrhsap ni bawk leh Pu PC Lalchunglura, Superintendent of Police, Lawngtlai te chuan tuichhak lama Polling Station hrang hrangte fangkualin, VC leh NGO- te nen inkawmhona an nei nghal a. VC leh NGO hruaitute leh Polling Station hrang hranga BLO - ten an lo dawngsawng a ni.
Pu Donny Lalruatsanga chuan inthlanna felfai tak awm turin theihtawp chhuah mek zel a ni, a ti a. India ramah chuan mipui thlan tlin ten ro an rel thin tih tarlangin, mipuite an duh zawng ngei thlang tling tur leh thianghlim taka inthlannna a awm theih nan theihtawp lo chhuahpui turin a ngen a. A bik takin party - te chu thianghlim taka campaign turin a ngen a, sum leh pai leng nasa lutuk tur veng thei ber an nih tih inhriaa, thianghlim taka campaign thin turin a chah . Polling Station - hrang hranga mamawh awm leh tihfel ngaite a hun takah tihfel a nih tur thu a tarlang a. Sawrkar leh mipuite inkara thawhhona tha a awm a pawimawh tih tarlangin Bawrhsap chuan tha taka sawrkar hmalakna lo tawiawm zel turin VC leh NGO- hruaitute a ngen nghal bawk.
Pu PC Lalchunglura, Superintendent of Police chuan inthlanna tluang taka neih a nih theih nan theihtawp chhuah a nih thu a tarlang a. A bik takin dan leh thupek kenkawh kawngah Police- ten theihtawp an chhuah dawn tiin, inthlanna hlawhtling taka neih a nih ngei a beisei thu a tarlang a. Police leh NGO, VC inkarah thawhhona tha zawk a awm zel a beisei thu a sawi a ni.
DEO leh SP- te hian Govt. Primary School -II, Lungzarhtum; Govt. Primary School- I,II,III Bualpui NG; Govt. Primary School -II, Siachangkawn, Govt. Primary School -I, II, S. Lungpher; Govt. Middle School, Cheural leh Govt. Middle School; Rawlbuk Polling Station - te an tlawh a . Khaw tinah hian VC leh NGO te nen inkawmhona an nei nghal a. Khawtlang hruaitute hian mamawh hrang hrangte an lo thlen a. Pu Donny Lalruatsanga chuan an mamawhna a hriatthiampui tih tarlangin, a theih chin chin ah intanpui a nih tur thu a tarlang.
District Election Officer (DEO) leh Superintendent of Police (SP) te hi Pu Thomas Maratha Hlychho, BDO, Sangau, leh Pu Lalrindika, SDC, ten an tawiawm a ni.
